Osiyo jamoalari Jahon chempionatini tark etdi

Chorak final o'yinlaridan so'ng yana 4ta jamoa musobaqani tark etdi: Eron, Yaponiya, Italiya va Ispaniya. Shunday qilib plyaj futboli bo'yicha Osiyoning eng kuchli ikki jamoasi yarim finalga chiqa olmadi. Quyida 1/4 final natijalarini keltirib o'tamiz. 

Belarus - Eron 4:3

Eron juda qizg'in kechgan bahsda imkoniyatni boy berdi. O'yinda forslar hisobni ochgan bo'lishiga qaramay, keyinchalik 4ta o'tkazib yuborishdi. So'ngra kiritilgan ikkita gol esa kamlik qildi. Darvoqe, ushbu bahsni hamyurtimiz Nayim Qosimov boshqarib bordi.

Iqtibos: "Bu jamoa mening oilam. Chunki Belarus menga terma jamoa bosh murabbiyi bo'lib ishlash imkonini berdi. Men bu jamoa bilash ishlashdan zavq olyapman. Har bir o'yinchi oilamiz azosi", (Niko, Belarus terma jamoasi bosh murabbiyi).

Portugaliya - Yaponiya 7:6

Bu o'yin gollarga boy bo'ldi. Hisob 5:5 bo'lib turganda Portugaliya gol urib oldinga chiqib oldi, lekin Yaponiya yana tenglashtirdi. O'yin tugashiga bir daqiqa qolganida esa evropaliklar g'alaba to'pini kiritib yarim final masalasini hal etishdi.

Iqtibos: "Yuragi xasta kishilar bu o'yinni ko'rmagani maqul. Juda chiroyli o'yin guvohi bo'ldik. Qiziqarli bahsda g'alaba qozondik", (Be Martins, Portugaliya terma jamoasi futbolchisi).

Iqtibos: "Biz mag'lubiyatga loyiq edik. Qo'pol xatolarga yo'l qo'ydik. Raqib jarima to'plaridan unumli foydalandi. Jahon chempionatida bunaqa o'yin ketmaydi. Mag'lubiyatdan xafamiz, lekin yana qaytamiz. Menga qolsa yana 5ta Jahon chempionatida o'ynamoqchiman", (Ozu Moreyra, Yaponiya terma jamoasi futbolchisi).

Senegal - Italiya 4:3

Turnirning eng shov-shuvli jamoasi deb bemalol Senegalni ko'rsatsa bo'ladi. Afrikaliklar guruhda Ispaniyani mag'lub etishning uddasidan chiqishgandi, chorak finalda esa Italiyadan ustun kelishdi. Ushbu bahsda Senegal darvozaboni chinakam qahramonlik ko'rsatdi.

Iqtibos: Biz amaldagi vice-chempionni musobaqadan chiqarib yubordik. Bu - katta voqea. Italiya plyaj futbolida doim zo'r o'ynaydi. Maqsadimiz Jahon kubogini qo'lga kiritish. Avvalgi mundialda Belarus bizni 6:3 hisobida mag'lub etgandi. Endi "qasos" olish payti keldi", (Al Seyni Ndiaye, Senegal terma jamoasi darvozaboni).

Iqtibos: "Jahon chempionati chorak finalida 3ta gol urdik, lekin bu hech narsani hal qilmaydi. Chunki mag'lub bo'lib turnirni tark etyapmiz. Buyog'iga xatolar ustida yanada jiddiy ishlaymiz. Italiya hali qaytadi", (Kamilo, Italiya terma jamoasi futbolchisi).

Braziliya - Ispaniya 6:0

Chorak finalning oxirgi o'yinida amaldagi chempion Braziliya favoritligini yana bir marta isbotlab qiyinchiliksiz Ispaniyani mag'lub etdi. Tajbribali Braziliya yosh Ispaniya darvozasiga javobsiz 6ta gol urdi. Bu o'yinda braziliyalik mohir hujumchi Godrigo ikki bor to'p kiritdi.

Iqtibos: "Jahon chempionati yarim finaliga chiqqanimizdan xursandmiz. Bu kabi turnirda zafar quchish uchun gol o'tkazmaslik talab qilinadi. To'g'ri, bu oson emas, ammo harakat qilib uddalasa bo'ladi. Himoyamiz ham zo'r. Ana endi Braziliya - Portugaliya klassik bahsini ko'ramiz. Ular kuchli jamoa, ularni hurmat qilamiz. lekin biz Braziliyamiz", (Rodrigo, Braziliya terma jamoasi futbolchisi).

Iqtibos: "Biz yosh jamoamiz, tajribamiz hali u qadar katta emas. Shuning uchun ishlashda davom etishimiz kerak. Biz ham katta jamoalardek bo'lishni xohlaymiz. Mag'lubiyat yomon, lekin bu ham dars beradi. Yangi darajaga chiqish uchun mehnat qilishda davom etamiz", (Chiki, Ispaniya terma jamoasi futbolchisi). 

Ertaga, 10 may kuni yarim final uchrashuvlari o'tkaziladi:

Belarus - Senegal

Portugaliya - Braziliya

Plyaj futboli bo'yicha Jahon chempionati finali hamda 3-o'rin uchun bahs 11 may kuni bo'lib o'tadi.

X. Xoliqov