"Olimpik" sardori: "Qizil kartochkadan keyin to'qnashuvlar ko'payib ketdi"

Uchrashuvdan keyin "olimpiyachilar" sardori Behzod SHamsievning fikrlari bilan qiziqdik:

"AGMK har qanday holatda medallar uchun kurashadigan, tajribali futbolchilar yig'ilgan kuchli jamoa. Qiyin bo'lishini bilardik. G'alaba qozonish uchun xarakter ko'rsatishimiz kerak edi. O'yin uchun barcha yigitlarga rahmat".

— Uchrashuv shunday asabiy ruhda o'tishini ham kutganmidingiz?

— Hech kim yutqazishni istamaydi. Biz nisbatan yosh jamoa bo'lganimiz uchun boshqa klublar 2 karra ko'proq yutqazmaslikka urunishadi. To'g'risi, asablar bunchalik charchashini kutmagandik. Qizil kartochkadan keyin o'yinda to'qnashuvlar ko'payib ketdi va bu qizg'inlikni oshirib yubordi. 

— Biz bilgan Behzod SHamsiev juda kuchli futbolchi. Ammo o'tgan yil oxiridagi jarohatlar tufayli faoliyatida pasayish yuzaga keldi. Hozir jismoniy holatingizda muammo yo'qmi? 

— SHukr, tuzalib qoldim. Hozircha sport formam to'liq tiklangani yo'q. Endi sekin-sekin yuqoriroq darajaga chiqishga harakat qilaman.