"Neftchi" Championat.asia da chiqqan xabarga munosabat bildirdi

Oldinroq saytimizda, "Neftchi" azolariga chempionlik uchun iPhone sovg'a qilingani borasida yangilik elon qilingan edi.

"OAV va ijtimoiy tarmoqlarda “Neftchi” futbol klubi azolariga chempionlik uchun iPhone sovg'a qilingani haqidagi xabarlarga aniqlik kiritishni lozim deb bilamiz.

Malum qilamizki, futbolchilarga iPhone sovg'a qilingani haqiqat. Biroq ushbu sovg'alar O'zbekiston chempionligini qo'lga kiritganlik uchun bonus sifatida emas, balki Yangi yil bayrami munosabati bilan klub homiylari tomonidan taqdim etilgan, yangi yil sovg'asi hisoblanadi.

Shu bilan birga, chempionlik uchun belgilangan moliyaviy bonus mablag'lari futbolchilarning shartnomalarida ko'rsatilgan tartib va miqdorlarda to'liq ravishda to'lab berilgan. iPhone sovg'alarining mazkur bonuslar bilan hech qanday bog'liqligi yo'qligi alohida takidlanadi.

“Neftchi” futbol klubi o'z faoliyatida doim ochiqlik va shaffoflik tamoyillariga amal qiladi hamda futbolchilar oldidagi barcha shartnomaviy majburiyatlarni o'z vaqtida bajarib kelmoqda.

Jamoatchilik va muxlislarimizni faqat rasmiy manbalarga tayanishga chaqiramiz" - deyiladi "Neftchi" bayonotida.