Mundial-2022. Muxlislar karvoni Bokuga etib bordi

Garchi terma jamoamiz bu musobaqada ishtirok eta olmasada, o'zbekistonlik muxlislarni o'z ichiga olgan karvon Qatarga yo'l olmoqda. Bu degani Jahon chempionati uchrashuvlarida albatta yurtimiz bayrog'ini uchratasiz. 

5 noyabr kuni Toshkentdan otlangan ishqibozlar guruhi Toshkent-Samarqand - Qozog'iston - Ozarbayjon - Eron- BAA-Saudiya Arabistoni yo'nalishi orqali Doxaga etib borishadi. 

Hamyurtlarimiz bugun Bokuda bo'lib turishibdi. Muxlislar karvoni etakchisi Abdurahmon Fozilov bu borada fikrlarini bildirib o'tdi. 

-  Yuk kemasiga avtomobillarimizni ortdik. Afsuski, hozirda Ozarbayjondagi vaziyatga ko'ra suvdan, quruqlikdan odamlarning kirib kelishi mumkin emas. Faqat katta yuk tashiydigan kemalarning boshqaruvchilariga mumkin ekan. Yo'lovchilarga taqiqlanishini aytishdi. Biz oxirigacha harakat qildik. Qiziq holati shuki, avtomobillarimizni ortib, chiptalarni olib bugun aeroportga kelganimizda kemalarga chiqish uchun ruxsat keldi. Lekin hammasi o'tib ketgandi. Bundan foyda yo'q edi. Aktauga o'rganib qolgandik. Bu erdagi vatandoshlarimiz, do'stlarimiz bilan ko'rishdik. Ayni paytda Bokudamiz. 

2018 yil Rossiyada bo'lib o'tgan har to'rt yillikning nufuzli musobaqasiga ham bir qancha ishqibozlar avtomobilda yo'l olgandi. Muxlislarimizning kundalik jarayonlari, safar taassurotlarini keyingi maqolalarimizda yana batafsil to'xtalib o'tamiz.