O'zbekiston futbolchilar uyushmasining 2025 yilgi bosh assambleyasi o'tkazildi

Milliy terma jamoamizning ilk bor Jahon chempionati yo'llanmasini qo'lga kiritishi butun xalqimizning qalbida g'urur va iftixor tuyg'ularini uyg'otdi. Shu bilan birga, o'smirlar terma jamoalari qita miqyosida tengsiz ekanini isbotlab, mamlakat futboli kelajagi ishonchli qo'llarda ekanini namoyon etdi.

Ana shunday tarixiy yil yakuni arafasida kecha Toshkent shahrida yangidan barpo etilgan Milliy futbol markazida O'zbekiston futbol associaciyasi hamda Futbolchilar uyushmasi hamkorligida yilning eng muhim tadbirlaridan biri — Futbolchilar uyushmasining 2025 yilgi asssambleyasi bo'lib o'tdi. Bu tadbir oddiy yig'ilish emas, balki futbolimizning o'tmishi, buguni va ertangi kunini bir nuqtaga jamlagan manaviy maydonga aylandi.

Assambleyada futbolimiz faxriylari, milliy terma jamoa safida turli yillarda yurtimiz sharafini himoya qilgan sobiq futbolchilar, hududiy futbol associaciyalari vice-prezidentlari hamda ommaviy axborot vositalari vakillari ishtirok etdi. Ular orasida bir vaqtlar stadionlarda minglab muxlislarning olqishi ostida to'p surgan, bugun esa o'z tajribasini yoshlarga ulashib kelayotgan qahramonlar bor edi. Ular orasida Mirjalol Qosimov, Sergey Lebedev, Abdusamad Do'rmonov, Muxtor Qurbonov, Anvar G'ofurov, Evgeniy Valickiy, Murod Aliev, Ignatiy Nesterov kabi nomlar bor edi.

Yig'ilish kun tartibidagi masalalar muhokama etilgandan so'ng, ishtirokchilar uchun yangi qurilgan Milliy futbol markazi bo'ylab ekskursiya tashkil etildi. Ekskursiya davomida mehmonlar zamonaviy talablarga to'liq javob beradigan infratuzilma, futbolchilarni tayyorlash, jismoniy tiklash va reabilitaciya qilish uchun yaratilgan keng imkoniyatlar bilan tanishdilar. Bu majmua nafaqat bino, balki kelajakdagi g'alabalarning mustahkam poydevori ekani alohida takidlandi.

Tadbir davomida so'zga chiqqan O'FA birinchi vice-prezidenti Ravshan Ermatov so'nggi yillarda amalga oshirilgan tizimli ishlar va ularning samaralari haqida to'xtalib o'tdi. O'FA prezidenti maslahatchisi Avaz Azizxo'jaev esa futbolni ommaviylashtirish va yoshlar bilan ishlash masalalarida qo'lga kiritilayotgan yutuqlarni alohida qayd etdi. Futbol faxriylari Azamat Abduraimov, Birodar Abduraimov, shuningdek, sobiq futbolchilar Anzur Ismoilov, Aziz Ibragimov, Farhod Tojiev va hududiy futbol associaciyalari vakillari o'z chiqishlarida bu yilgi tarixiy yutuqlar tasodif emasligini, yaratib berilayotgan shart-sharoitlar va to'g'ri boshqaruv natijasi ekanini takidladilar.

Assambleya yakunida ishtirokchilar yagona fikrda birlashdilar: bugungi yutuqlar — faqat boshlanish. Milliy futbol markazi, kuchli infratuzilma va birlashgan jamoatchilik bilan O'zbekiston futboli oldida yanada katta marralar, yangi g'alabalar turibdi. 2025 yil esa ana shu ulkan yo'lning yorqin boshlanishi sifatida tarixda qoladi.

O'zbekiston futbolchilar uyushmasi assambleyasidan to'liq suratlarni saytimizning maxsus bo'limida tomosha qilishingiz mumkin >>>>> GALEREYA