"Metallurg" 4 nafar futbolchi bilan shartnoma imzoladi

Jumladan, muxlislar 2018 yilgi mavsumda Bekobodning “Metallurg” jamoasida ham bir qator yangi nomlarni ko'rishadi. O'tgan hafta yig'in yakunlariga ko'ra jamoa ko'rigida bo'lib turgan Dilyorbek Irmatov bilan shartnoma imzolandi.

Dilyorbek Irmatovni futbol muxlislari Farg'onaning “Neftchi” jamoasidagi ishtiroki orqali yaxshi tanishadi. Irmatov bungacha sakkiz mavsum “Neftchi”da muvaffaqiyatli to'p tepgan.

Tez orada bekobodliklar safini to'ldirgan o'yinchilarning qaysi raqamlarda maydonga chiqishi malum bo'ladi.

Eslatib o'tamiz, Dilyorbekka qadar “Metallurg” darvozabon Nikita Ribkin, himoyachi SHerzod Fayziev hamda yarim himoyachi SHahzodbek SHaymanovlar bilan shartnomani rasmiylashtirgan edi. Quyida ushbu futbolchilar haqidagi malumotlar bilan tanishing:

Nikita Ribkin

20 yanvar 1991 yilda tug'ilgan, 27 yoshda
2018 yildan “Metallurg” bilan shartnoma imzoladi.
2011-2016 yillarda “Paxtakor”, 2016-17 yillarda “Qo'qon 1912” jamoalarida o'ynagan. Oliy ligada jami 36 uchrashuvda darvozani qo'riqlagan. 2015-16 yillarda O'zbekiston Superkubogida o'ynagan, 2011 yili O'zbekiston kubogi sohibi bo'lgan, 2012, 2014, 2015 yillarda O'zbekiston chempioni bo'lgan.

Dilyorbek Irmatov

30 aprel 1989 yilda tug'ilgan, 28 yoshda
2018 yildan “Metallurg” bilan shartnoma imzoladi.
2010-2017 yillar oralig'ida “Neftchi” jamoasi sharafini himoya etgan. 187 uchrashuvda maydonga chiqib, 5ta gol urgan, 48 marta ogohlantirilgan, 1 marta maydondan chetlatilgan. O'tgan mavsumda 27 o'yinda maydonga tushib, 4ta sariq kartochka ishlagan va shulardan ikkitasini bitta o'yinda olganligi bois maydondan chetlatilgan.

SHerzod Fayziev

6 fevral 1992 yilda tug'ilgan, 26 yoshda.
2018 yildan “Metallurg” jamoasi bilan shartnoma imzoladi.
Ikki karra O'zbekiston chempioni (2016, 2017), ikki marta O'zbekiston kubogi sohibi (2016, 2017). 2011-15 yillarda “Mashal”, 2016-17 yillardan “Lokomotiv”da o'ynagan. Oliy liga musobaqalarida jami 101ta uchrashuvda maydonga chiqqan. 80 uchrashuvda asosiy tarkibda boshlagan bo'lsa, 21ta uchrashuvda zahiradan o'yinga qo'shilgan. 2ta gol urgan. 7 marta ogohlantirilgan. Bir mavsumda 3tadan ko'p sariq olmagan. Maydondan chetlatilmagan.

SHahzod SHaymanov

2 aprel 1992 yilda tug'ilgan, 25 yoshda.
2018 yildan “Metallurg” bilan shartnoma imzoladi.
2012 yildan “Mashal” tarkibida o'ynab kelgan. 2014 yilgi mavsumning birinchi yarmini “Andijon” safida o'tkazgan. Oliy liga musobaqalarida jami 114 ta uchrashuvda maydonga chiqqan, 11 ta gol kiritgan, 21 marta ogohlantirilgan. 2013 yili mamlakat birinchiligi g'olibi bo'lgan, 2015 yili esa O'zbekiston kubogining finalida o'ynagan.