“Lokomotiv” uch nafar yangi futbolchi bilan shartnoma imzoladi

Yangi boshlanadigan mavsumga jiddiy hozirlik ko'rayotgan Toshkentning “Lokomotiv” klubi bugun o'z tarkibini uch nafar yangi futbolchi bilan kuchaytirib oldi. O'zbekiston milliy terma jamoasi azosi Server Jeparov, oliy ligadagi eng kuchli legionerlardan biri Kaxi Maxaradze hamda “Mashal” safida yaxshi o'yin ko'rsatib kelayotgan iqtidorli himoyachi SHerzod Fayziev bugun “temiryo'lchilar” bilan bir yillik shartnomaga imzo chekishdi.

Bu futbolchilarni muxlislarga ortiqcha tanishtirib o'tirishning hojati bo'lmasa kerak. Xususan, Server Jeparov mana bir necha yildirki yuqori saviyada o'yin namoyish etib kelmoqda. Qolaversa, u milliy terma jamoamizning almashtirib bo'lmas o'yinchilaridan biri hisoblanadi.

Kaxi Maxaradzega keladigan bo'lsak, gruziyalik legioner O'zbekistondagi faoliyatini ilk bor aynan “Lokomotiv”da boshlagan bo'lib, u 2009-2010 yilgi mavsumlarni jamoamiz safida o'tkazgan. SHundan so'ng futbolchi “Paxtakor” tarkibiga borib qo'shildi va keyingi yillarni poytaxtning boshqa bir jamoasida o'tkazdi. Maxaradze o'z vaqtida “temiryo'lchilar” tarkibida 34ta o'yinda maydonga tushib, ikkita gol urgandi.

“Mashal” futbol akademiyasi tarbiyalanuvchilaridan biri SHerzod Fayziev ham bundan buyon “temiryo'lchilar” azosi hisoblanadi. U ham bir yillik shartnomaga imzo chekdi. 2009 yildan beri shu vaqtga qadar “Mashal” tarkbida harakat qilib kelgan Fayziev 1992 yilda tug'ilgan bo'lib, bir vaqtning o'zida ham himoya markazi, ham qanot himoyasida harakat qila oladi. “Mashal”da sardorlik darajasiga ko'tarilgan bu futbolchidan ham umidimiz katta va o'ylaymizki, SHerzod Fayziev “Loko”da albatta o'zini ko'rsata oladi. Biz “Lokomotiv” bilan shartnoma imzolagan har uchala futbolchiga ham omad tilab qolamiz.