Fevzi Davletov: "G'alaba qozonish uchun gol urish kerak, biz esa uch o'yindan buyon gol ura olmayapmiz"

"Birinchi bo'limda jamoa ancha harakat qildi. Yuqoriroq o'ynashga harakat qildik va vaziyatlar yaratdik. So'nggi pasdagi xatolarimiz tufayli vaziyatlarni yakunlashda muammoga duch keldik. Ikkinchi bo'limda esa ko'proq himoyaga etibor berib qo'ydik. Zaxiradan o'yinga qo'shilganlar ham o'yin tempini kuchaytira olmadi. O'yin yakunida esa gol o'tkazib yubordik. Himoyamiz o'sha vaziyatda hushyorroq turishi kerak edi. Sergeev gol urib ketdi. G'alaba qozonish uchun gol urish kerak, biz esa uch o'yindan buyon gol ura olmayapmiz," - dedi Fevzi Davletov bahs yakunlangach.

- Gol urilgan vaziyatda himoyachilar Sergeevni personal tarzda qo'riqlashi kerakmidi? Sergeev kabi hujumchiga imkoniyat taqdim etish juda xavfli-ku...

- Shunday. Bunday vaziyatlarda himoyachi har doim futbolchiga qarab harakatlanishi kerak. Biz o'sha vaziyatda juda yuqoriga chiqib ketdik. Himoya chizig'ini pastroq ushlashimiz kerak edi. Sergeev bitta aldamchi harakat ko'rsatdi va himoyachilardan qochib ketdi. Darvozabon ham qutqarishi mumkin bo'lgandir balki, vaziyat takrorini yana bir bor ko'rib chiqamiz. 

- "Surxon" bir necha o'yindan buyon gol ura olmayapti. Buning sababi nimada?

- Bu mahoratga bog'liq. So'nggi mavsumlarda nechta futbolchimiz qancha gol urganini ko'rsangiz, barchasini bilib olasiz. Faqatgina Rustaga bog'lanib qolish noto'g'ri. Boshqa futbolchilarga gol urishi va jamoaga yordam berishi kerak. Futbol - jamoaviy o'yin.

- Jamoa sardori Shamsiev bugun tayanch yarim himoyachi poziciyasida o'ynadi. U oldin ham ushbu ampluada o'ynagan, Shamsievning bugungi o'yiniga baho berib o'tsangiz?

- Ikkita yarim himoyachimiz jarohat olishdi. Shu sababli maydon markaziga Behzodni qo'yishga qaror qildik.