Jamshid Iskanderov: "Navbahor"da qolamanmi? Xudo xohlasa, yangiliklar bo'lib qoladi"

Darhaqiqat, yarim himoyachi uchun bu mavsum qandaydir o'ziga hos qaytish bo'ldi. U butun yil davomida "Navbahor"ni o'z ortidan ergashtira oldi. Jamoasi bilan mamlakat kumush medallariga ega chiqdi, kubok finaliga qadar etib bordi. Umumiy qilib aytganda biz bilgan Jamshid Iskanderov yana avvalgi formasini tiklab oldi. Tadbir yakunlangach "Navbahor" futbolchining fikrlariga quloq tutdik.

"Ochig'i juda hayajondaman. Yoqimli sovrin. CHunki bundan 8 yil oldin O'zbekiston chempionatining "eng yaxshi futbolchisi" bo'lgan edim. Oradan shuncha vaqt o'tib mamlakatning "eng yaxshi futbolchisi", deb topildim. Tasavvur qila olmayman. Juda xursandman. 

Sovrinni kutmagandim. Lekin yaxshi niyatda kelgandim. Xudoga shukur sovrin nasib qildi. Fursatdan foydalanib "Navbahor" klubi rahbariyati, jamoadoshlarimga minnatdorchilik bildiraman. Bizni qo'llab-quvvatlagan, duo qilib turgan muxlislar, oila azolarimga ham tashakkurimni izhor qilmoqchiman. Futbolchilar yanada yaxshiroq harakat qilib, ishqibozlarni xursand qilishga intilamiz. 

Terma jamoaga kelsak, har bir futbolchi buni istaydi.  Yil davomida harakat qildim. To'xtamayman. Hozirgi kunda murabbiyning o'z uslubi, tanlovi bor. Unga qandaydir etirozim yo'q. CHunki men futbolchiman. 

"Navbahor" bilan shartnomam yakunlangan. Barcha bilan muloqotdamiz. Xudo xohlasa, yangiliklar bo'lib qoladi",- deydi Jamshid Iskanderov.