Ilhom Mo'minjonov: "O'yin durangga mos edi"

"Bugungi o'yin durangga mos edi. Biroq himoyadagi qo'pol xatolarimiz tufayli gol o'tkazib yubordik. Yigitlar bor vujudlari bilan maydonda harakat qilishgani uchun tashakkur bildiraman. Bu - futbol... Maydon tekis, to'p dumaloq. Xayot davom etadi. Kerakli xulosalarni chiqarib, "Lokomotiv"ga qarshi tayyorgarlik ko'rishni boshlaymiz. Keyingi o'yinni o'z maydonimizda o'tkazamiz. Namanganda "Navbahor" hujumkor ruhda to'p suradi. Har bir o'yinda g'alabani o'z oldimizga maqsad qilib tushamiz. To'g'ri, kam gol uryapmiz. SHuning uchun hujumda katta muammolarimiz bor. Bizni faqatgina kam gol o'tkazayotganimiz quvontiradi, xolos. Mavsumni kuchli uchlikda yakunlashga harakat qilamiz. Namangandan kelib, bizni shunchalik qo'llab-quvvatlagan muxlislarimizdan murabbiylar shtabi nomidan uzr so'rayman. Navbatda bizni o'z uyimizda ikkita og'ir bellashuv kutib turibdi. Keyingi o'yinlarda ham muxlislarimizni ko'p miqdorda o'yingohga kelib, bizni olg'a chorlashlarini iltimos qilaman.

- Nima uchun jamoa yaxshi o'yin namoyish etib turganida himoyachilarni maydonga tushirdingiz?
- Maqsadim himoyani kuchaytirish emasdi. Ahamiyat bergan bo'lsangiz, so'nggi o'yinlarda Samatov va SHamsiddinov faqat yarim himoyada o'ynashmoqda. Bu futbolchilarim oxirgi uch o'yinda mazkur chiziqda yaxshi harakat qilishgani uchun shunday qaror chiqardim. Ularning ikkisi ham zaxiradan maydonga tushib, o'yinimizni kuchaytirishdi.

- "Paxtakor" o'yinida so'nggi paytlarda pasayish kuzatilmoqda. Jamoa "SHo'rtan" va "Mashal"ga yutqazdi. Bugun "Navbahor" uchrashuv davomida durangga o'ynagandek taassurot qoldirdi.
- Bu fikrga qo'shilmayman. "Paxtakor"da pasayish yo'q. Hozirgi kunda jamoada raqobat kuchaygan. Barcha jamoalarning tarkiblarida yoshlar o'sishmoqda. Biz uch ochkoni ko'zlab maydonga tushgandik...

- Oybek Qilichev so'nggi paytlarda agressiv xulqni ko'rsatmoqda. U bilan bu masala bo'yicha alohida gaplashiladimi?
- Oybekning agressiv o'yini menga yoqadi. Ushbu futbolchining harakatlari jamoadoshlariga ruhan qo'shimcha kuch bag'ishlaydi. Uning "Dinamo" bilan kechgan o'yinda olgan qizil kartochkasi o'yindan tashqarida bo'lgan. Buning uchun u jazolangan. Har bir bahsda Oybek bor kuchini maydonda sarflagani uchun unga doim raxmat aytaman. Bilasiz, Qilichev avval "Paxtakor"da o'ynagan. Oybek sobiq jamoadoshlari nimalarga qodirligini yaxshi biladi. Bugun Qilichev gol urishga vada bergandi, lekin afsuski niyati amalga oshmadi.