Ikki ertakning yakuni bir nuqtada. Afsonaning xayrlashuv o'yini

Final ostonasida mag'lub bo'lganlar to'qnashuvi.

Odatda 3-o'rin uchun kechadigan bahslar, biz kutganchalik qiziq o'tmaydi. Jamoalar ruhiy tomonlama singan tarzda bahsga etib kelishadi, bu esa o'yin “kartinasi”ga tasir o'tkazmasdan qolmaydi. Yarim finalda xorvatlar 0-3, afrikaliklar esa 0-2 hisobida mag'lub bo'lishganidan xabardorsiz. Ikkala tomonda ham, voqealar rivoji tabiiy tarzda yuz berdi, sensaciya sodir bo'lmadi va kuchlilar g'alaba qozondi. SHu sababdan, bugungi bahs oldingilaridan farqli, tomonlar alamli tarzda mag'lub bo'lishmadi va katta ehtimol, bugun medal uchun jang bo'ladi. Xorvatiya 1998 yilgi mundialda bronza va 2018 yilgi chempionatda kumush medallarga ega chiqqan. Marokashda esa butunlay boshqacha kayfiyat, ular mundiallarda jami 5 bor qatnashishgan va biror marotaba medallarga ega chiqishmagan. Bungacha hali guruhdan chiqa olmagan termaning, mo'jizaviy tarzda yarim finalga qadar etib borishi, favqulodda kamyob hodisa. Ertak yakuni yaxshi tugashi uchun, bronza medallarining qo'lga kiritilishi ayni muddao bo'lardi. SHu tomondan ishtiyoq afrikaliklarda ko'proq bo'lsa kerak.  

Ehtimoliy o'yin “kartina”si. 

Jamoalar guruh bosqichida bir kvartetdan joy olganini bilasiz. Guruh bosqichi doirasidagi o'yinda 0-0 hisobi qayd etilagn. O'shanda, Xorvatiya birinchi raqamli jamoa bo'lib o'ynagan, vaziyatlar va darvozaga zarbalar yo'llash bo'yicha Marokash ustunlik qilgan. Bugun ham katta ehtimol, xorvatlar birinchi raqamli jamoa bo'lib o'ynashadi, afrikaliklar esa omadlarini qarshi hujumlardan izlashsalar kerak. Kadrlar va resurslar masalasida sifat evropaliklar tarafda, Marokash esa kuchli ishtiyoq va tartibli o'yin evaziga g'alaba qozonishga harakat qiladi. 

Afsonaning xayrlashuv o'yini.

Krishtianuga tengdosh bo'lgan Luka Modrich hozirda 37 yoshda va Marokashga qarshi o'yin afsona uchun terma libosidagi so'nggi katta chiqish bo'lishi mumkin. SHu tomondan xorvatlar o'z daholari uchun, sovg'a tayyorlashga urunishsalar kerak. Luka shubhasiz, xorvat futboli tarixidagi eng yaxshi futbolchi, afsona ketar chog'ida so'zsiz bunga haqli. Modrichning ehtimoliy xayrlashuv o'yini, bugungi bahsga intriga qo'shishiga ishonaman. Nima ham derdik! Ikki ertakning yakuni bir nuqtada kesishdi, yakunda bir tomon mag'lub bo'lishga majbur. Ko'ramiz va kuzatamiz.

Sizchi? Qadrdon o'quvchi, qaysi tomonning imkoniyatlarini yuqori baholaysiz?

Jaloliddin Xalilov.