Farhod Safarov: “PFL Kubogida "o'lim" guruhidan joy olganmiz”

Xayrulla Abdiev boshqaruvidagi jamoa bu yilgi turnirni ham g'alaba bilan boshladi. “S” guruhidan o'rin olgan “Obod” bugun elita vakili “Navbahor”ni mag'lub etdi. Uchrashuvdan so'ng klub direktori Farhod Safarov bilan suhbatlashdik.
- Yodingizda bo'lsa o'tkan yili PFL Kubogida finalga qadar etib borgandik –deya gap boshladi Safarov. – Maqsadimiz kamida shu natijani takrorlashdir. Bu yo'lda yigitlar astoydil xarakat qilmoqda.

- “Navbahor”ga qarshi kechgan o'yin haqida fikringiz qanday?
- O'yin yaxshi o'tdi. Futbolchilarimizda g'alaba uchun ishtiyoq yuqori ekanligini ko'rish mumkin edi. Futbolda bu juda muhimdir.

- Oliy liga vakili nimani evaziga mag'lub etildi?
- “Navbahor” ham jiddiy qarshilik ko'rsatdi. Lekin bitta gol o'yin taqdirini hal qildi.

- Jamoangiz o'rin olgan guruh haqida nima deysiz?
- Bemalol ayta olamanki, “o'lim” guruhi! Etibor bering bizning “S” guruhda oliy liga jamoalari o'rin olgan. “Navbahor”, “SHo'rtan”, “Lokomotiv” hamda “Obod”. Bu biz uchun ham qiziqarli bo'ladi.

- “Obod”ni yangi mavsumga ko'rayotgan tayyorgarligidan ko'nglingiz to'lyaptimi?
- Albatta. Hammasi rejadagidek ketmoqda. Munosib ravishda hozirlik ko'rishimiz uchun etarli sharoitlar yaratilgan. Umid qilamanki, chempionatga qadar yigitlar yanada o'sishga erishadi.

- Tarkibda ham o'zgarishlar qilinayotganini ko'ryapmiz...
- Ha, o'tgan yilgiga nisbatan bu yil tarkibni yanada kuchaytirib raqobatni oshirmoqchimiz. O'ylaymanki tarkibimizga birinchi liga toifasidagi mahoratli o'yinchilar qo'shilmoqda.

- Ko'pchilik muxlislar endilikda “Obod”ni oliy ligaga chiqish uchun asosiy davogarlardan biri deya etirof etmoqda.
- Bundan xursandmiz. Munosib bahoni aynan ishqibozlar beradi.

- Aslida bu yil jamoa oldiga qanday vazifa qo'yilmoqda?
- Har bir bahsda mazmunli o'yin namoyish etib, g'alaba qozonishga xarakat qilamiz. O'tgan yili debyut mavsum bo'lishiga qaramay, yigitlarimiz yaxshi natija ko'rsatgandi. O'ylaymanki bu yil undan-da yaxshiroq natijaga erishamiz. To'g'risi hozir avvalo PFL Kubogini yutishni o'ylayapmiz. Keyin chempionat haqida jiddiy bosh qotiramiz.


Islombek Rustambekov suhbatlashdi.