Farhod Nishonov: "O'yinoldi jarayonlarda o'ng qanot himoyachimiz o'zini yomon his qildi"

O'yin haqida

- Qiyin o'yin o'tkazdik. O'tgan turda yutqazib qo'yganimiz jamoamiz yigitlariga qattiq tasir qilgandi. Bugungi maqsad faqat g'alaba edi. Yigitlar xarakter ko'rsata olishdi, yakunda g'alabani tantana qildik. Jamoaga g'oliblik ruhiyatini singdirish asosiy maqsadlarimizdan hisoblanadi.

- Qanot vingerlarida tezlik va tajriba etishmagandek ko'rindi. Hujumlar asosan markazdan tashkil etildi. Bu ko'rsatmamidi yoki o'yinga tanlangan uslubmi?

- Yo'q, bu o'yindan kelib chiqib yuzaga kelgan vaziyat. Jarayonning borishiga qarab shunday o'yin ko'rsatdik. "Do'stlik"ning o'yinlarini ko'rib chiqqanmiz, ularda tezkor futbolchilar bor edi. Qo'shimcha o'rnida, o'yinoldi jarayonlarda qanot himoyachimiz o'zini yomon his qildi.

- Hozir holati yaxshimi?

- Ha, qo'rqadigan joyi yo'q. Keyingi o'yinga tayyor bo'ladi. Uning o'rniga boshqa futbolchini tushirdik, o'zini yaxshi ko'rsatdi.

- "Do'stlik" birinchi bo'limda 2 ta yaxshi vaziyatga ega bo'ldi. SHu holatlarda jamoangiz himoya chizig'ida palapartishliklar bor ekandek ko'rindi...

- Tarkibimiz yosh, asosan 2006-2007 yillarda tug'ilgan futbolchilar o'ynayapti. Keyin ular turli akademiyalardan jalb etilgan. O'zaro bir-birlarini tushunishga vaqt kerak. Keyin bu yoshdagi futbolchilarda hayajon ham kuchli bo'ladi.

- O'sha vaziyatlarda gol bo'lmagani omad bilan bog'liqmi?

- Futbolda omadning o'rni hamisha muhim. Biroq, o'sha vaziyatlarda darvozabonimiz yaxshi harakat qildi. To'g'ri joy tanlagani bois raqib hujumchisida sarosima ko'zga tashlandi, aniq harakat qila olmadi.

- Jamoangiz tarkibi yosh futbolchilardan iborat. "Qo'qon-1912", "Buxoro", "Mashal", SHo'rtan" kabi tajribali futbolchilari bor bo'lgan jamoalarga qarshi qanchalik jiddiy kurasha olasizlar?

- Tarkibimiz yosh ekani to'g'ri. Biz maydondan tashqarida bu jamoalarni hurmat qilamiz. Superliga vazifasi qo'yilgan klublar. Maydonda har bir raqibga qarshi g'alaba uchun maydonga chiqamiz.