Elit OCHL. Ro'ziqul Berdiev: "Kuchimiz boricha raqibga qarshilik ko'rsatdik"

Qarshidagi Markaziy stadionda kechgan bahsda "Nasaf" 1:2 hisobida imkoniyatni boy berdi. O'yindan keyingi matbuot anjumanida qarshiliklar ustozi Ro'ziqul Berdiev o'z fikrlarini bildirdi.

- O'yin haqida fikringiz?

- Bahs og'ir o'tishini kecha takidlagandim. Kecha o'yindan oldingi matbuot anjumanida jismoniy holat haqida ham gapirgandm. Kuchimiz boricha raqibga qarshilik ko'rsatdik. Jismoniy toliqish sabab bazi hollarda ustunlikni berib qo'ydik. Afsuski, standartdan ikkita gol o'tkazib mag'lubiyatga uchradik. Bu paytda etiborsizlik ro'y berdi, futbolchilarimiz raqib o'yinchilarini yaxshilab qo'riqlashi kerak edi. Buni albatta tahlil chiqlib chiqamiz.

- Abduvohid Nematovning xatolari haqida nima deya olasiz?

- Abduvohid yaxshi darvozabon, biroq unga nimadir xalaqit beryapti. Bosim tasir qilyaptimi yoki raqobat yo'qligidanmi, bilmayman. Lekin bugungi mag'lubiyat uchun faqat uni ayblash kerak emas, hamma birdek aybdor. Hozir shunday bosqichdamizki, "Al Vahda"ga o'xshagan jamoalar bilan tengma-teng o'ynash uchun o'zimizning eng zo'r holatimizda bo'lishimiz kerak.

- Elit OCHLda to'rtta tur ortda qoldi va "Nasaf" hisobida hozircha 0 ochko bor. Shunday kelib chiqib aytsak, jamoa Osiyoda o'zini ko'rsatishi uchun qanday legionerlar kerak deb o'ylaysiz va hozirgi legionerlar jamoaga qanchalik yordam bera olyapti?

- Osiyoda o'zimizni ko'rsatishimiz uchun ikki barobar kuchli legionerlar kerak. OCHLdagi har bir o'yin bizga dars bo'lyapti, xulosa qilsa bo'ladigan jihatlar ko'p. Judayam kuchli tarkibga ega bo'lishimiz kerak. Shunga yarasha legionerlar ham zo'r bo'lishi kerak, lekin zo'r legionerni olib kelish oson emasligini o'zingiz ham bilasiz.

- Milliy chempionat haqida savol bermoqchiman. "Nasaf"ni safarda "Paxtakor"ga qarshi bahs kutib turibdi. "Paxtakor" Kubokni qo'lga kiritdi, mana bugun "Bunyodkor"ni ham mag'lub etdi. Jamoada kayfiyat yuqori, "Nasaf"da esa buning aksi. Balki chempionlik qo'ldan ketar, lekin ikkinchi o'rinni ushlab qolishga qanchalik ishonsak bo'ladi?

- Siz hozir ko'p narsani chalkashtirib yubordingiz. Biz xalqaro o'yindan keyingi matbuot anjumanida o'tiribmiz, siz bo'lsa milliy chempignat haqida savol beryasiz, o'rinlar haqida gapiryapsiz. Haliyam eng yaxshi imkoniyatga egamiz va bunga umuman shubha qilganim yo'q. Biz qiyin bosqichdamiz va o'zimizni ko'rsatgan holda bu bosqichdan o'tib olishimiz kerak.