Sanjar Tursunov: "Qo'qon-1912"ga urgan golim faoliyatimdagi eng chiroylisi"

Mazkur uchrashuvda 2:1 hisobida g'alaba qozongan Mirjalol Qosimov shogirdlari raqib darozasiga bir-biridan chiroyli gollarni urishdi. Ayniqsa, Sanjar Tursunov tomonidan urilgan gol nafaqat turning, balki, joriy mavsumning ham bezagiga aylandi.  Xo'sh bu borada uning o'zi nima deydi?

"Qo'qon-1912" biz bilan o'yinni juda yaxshi boshladi. To'g'ri aytdingiz raqib safidagi futbolchilar jismoniy jihatdan tayyor ekan. Optimal sport formasidaligi sezilib turdi. SHu vaqtgacha o'ynagan jamoalarimiz ichida o'yin sifati bo'yicha, maydonda kurash olib borish borasida "Qo'qon-1912" jamoasi yaqqol ajralib turdi. Murabbiyning imzosi ko'rinib turibdi. Boz ustiga ilk daqiqalardan besh nafar himoyachi bilan harakatlanganligi uchun gol ura olmadik.

Golimga keladigan bo'lsak, bu tavakkal berilgan zarba emasdi. To'pni qabul qilib olganimdan keyin tezda darvozabonga nigoh tashladim. Oldinga chiqib ketganidan foydalanib zarba berdim. 

Ha, qo'qonliklar darvozasiga urgan golimni faoliyatimdagi eng chiroylisi desa ham bo'ladi. Faoliyatim davomida ko'p ham to'p kiritmagan bo'lsamda bunisi eng zo'ri deya olaman. 

"Paxtakor" bilan yaxshi o'yin bo'lishiga ishonchim komil. Ular hozirda turnir jadvalida birinchi o'rinda ketmoqda. Raqibni nafaqat hujum chizig'i, balki, barcha chiziqlarida mahoratli va tajribali futbolchilar jamlangan. SHu bois bizga himoyalanishimiz ham, hujum qilishimiz ham oson bo'lmaydi. Muxlislar uchun g'alaba qozonishga borimizni beramiz",- deydi Sanjar Tursunov.

Abdulaziz Iskandarov yozib oldi.