"Bu mag'lubiyatdan fojea yasash kerak emas, Osiyo grandi bilan qo'rqmay o'ynagani uchun ham rahmat" - "Al Ahli" - "Nasaf" uchrashuvi mutaxassis nigohida

Birinchi bo'limda "ajdarlar" sensaciya yarata olib, amaldagi g'olibni qiyin ahvolga solishdi. Biroq ikkinchi bo'limda raqib safidagi yulduzlar o'z so'zini aytib, g'alabaga erishishdi. Bellashuv haqida futbol mutaxassisi Ulug'bek Mirzaev quyidagicha fikr bildirdi.

— "Nasaf" jamoasining Saudiya Arabistoni klublari bilan to'qnashuvidan ko'ryapmizki, jamoa bu musobaqaga katta tayyorgarlik ko'rmagan. Qaysi manoda? "Nasaf"ning umumiy futbolchilarining narxi 10 million evro bo'lsa, "Nasaf" bilan o'ynaydigan Saudiya klublarining narxlari 17–20 baravar baland hisoblanadi. Raqiblar tarkibida saviyasi juda baland futbolchilarga teng tarkib yig'ishi imkonsiz edi. Shuning uchun "Nasaf" munosib qatnashib, top futbolchilarga qarshi o'ynab yoshlarning tajribasi ortishi foyda bo'ladi.

"Nasaf" asosiy etiborni ichki chempionatga, chempionlikni saqlab qolishga qaratganini sezish ham mumkin. Kechagi o'yinni "Nasaf" juda yaxshi boshladi, raqib xatolaridan unumli foydalanishdi. Norchaevni yaxshi poziciyalarga chiqarishdi va u ikkita imkoniyatdan maksimal foydalandi. Ammo "Al-Ahli" jamoasi futbolchilari yarim kuch bilan o'zlarini toliqtirmay, jarohatlarga yo'liqmasdan g'alaba qozonmoqchi bo'ldi. Lekin bu amalga oshmaganini ko'rib, tanaffusdan so'ng bor kuchlarini ishga solishdi. "Nasaf" bunga qarshi hech narsa qila olmadi.

Tezkor kombinaciyalar uyushtirilishi, raqiblarning tezkor harakatidan "Nasaf" futbolchilari to'pni ko'rmay qolgan holatlari ham bo'ldi. O'z paytida "Chelsi", PSV, "Manchester Siti" etakchilari bo'lgan futbolchilar bor kuchlarini ishga solsa, Superliga jamoalari qarshilik ko'rsata olmasligi yaqqol namoyon bo'ldi. Buni to'g'ri tushunish kerak, chunki mahorati ikki xil bo'lgan jamoalar uchrashdi.

— Bunda "Al-Ahli" g'alaba qozondi. Bunday jamoalar o'yinda birdan burilish yasay olishini ko'rdik. "Nasaf" maydonni boshini tik tutgan holda tark etsa bo'laverardi. Mahalliy ishqibozlarni, raqibni qo'rqitib yubordi. Amaldagi Elit OCHL g'olibini birinchi bo'limda mag'lubiyatga uchrata olgani katta sensaciya edi. Bu o'yinda "Nasaf" futbolchilarini koyimaymiz, chunki keyingi o'yinlarda ham oson bo'lmasligini hamma bilib turibdi. "Al-Hilol", "Al-Ittihod" kabi raqiblar bor. Sakkiztalikka kirish uchun "Nasaf"ga kamida 9 ochko kerak bo'ladi. Lekin bu oson bo'lmaydi. "Traktor", "Al-Shorta", "Sharja" kabi jamoalardan ochko olishi mumkin.

Shunday ekan, bu mag'lubiyatdan fojea yasash kerak emas — to'g'ri qabul qilish kerak. Ko'p futbolchilarimiz yanada zo'r o'yinchi bo'lib o'sishi uchun dars bo'ladi, deb o'ylayman. OCHLda natijani ortidan quvlash "Nasaf"ga hech narsa bermaydi, raqiblar grand jamoalar. Shu bois "Nasaf"ga ajoyib o'yin uchun, qo'rqmay harakat qilgani va hissiyotlar ulashgani uchun rahmat aytaman. O'zim bevosita stadiondan o'yinni kuzatdim. "Nasaf"ning Osiyo grandiga qarshi qo'rqmagani va o'z kuchini ko'rsata olgani uchun qoyil qolish kerak.