Bilasizmi? Superligada mag'lub bo'lmagan ikkita jamoa qoldi

6-turga kelib Superligada hali mag'lubiyatga uchramagan ikkita jamoa qoldi. Bular - "Bunyodkor" va "Nasaf". Kechagi o'yingacha yutqazmagan jamoalar soni uchta edi, biroq "Bunyodkor" - "Metallurg" bahsida bekobodliklar 1:3 hisobida imkoniyatni boy berishdi.

"Nasaf" mavsum boshidan beri uchta durang o'ynadi va uch marta g'alaba qozondi. To'plar nisbati 8-4. Kecha bu jamoa Qarshida amaldagi chempion "Lokomotiv"ni 2:1 hisobida mag'lub etdi.

"Bunyodkor" esa Superligani durang bilan boshlab, shundan keyin qatorasiga beshta uchrashuvda g'alabaga erishdi. Mirjalol Qosimov shogirdlari ketma-ket "Paxtakor", "Neftchi", "Buxoro", "Qizilqum" va "Metallurg"dan ustun kelishdi. Qizig'i, "Bunyodkor" o'z maydonidagi oxirgi ikkita bahsni 3:1 hisobidagi g'alaba bilan yakunladi.

Xo'sh, sizningcha qaysi jamoaning mag'lubiyatsiz seriyasi uzoq davom etadi?