Baxtiyor Sattorov: SHerdor Xorazmni kuchli ishtiyoq evaziga mag'lub etdi

- Nimchorak finalga chiqqanimizdan juda xursandmiz. “Xorazm” klubi ancha tajribali jamoa sanaladi. Tarkibi va murabbiylari Oliy Ligada tajriba to'plagan. Bizning “SHerdor” jamoamiz esa yosh bo'lishiga qaramay, bahsda faqat g'alabani ko'zlagandik. Yigitlarga rahmat, ikkinchi bo'limda uchta gol urishga erishdik. Ammo o'yinning so'nggi 10 daqiqaligida g'alabaga erishdik deb hisoblashdi chog'i, bemalol to'p surganligimiz uchun ikkita to'p o'tkazib yubordik. “Xorazm” bilan o'yin juda ko'p kamchiliklarimizni ko'rsatdi, ular ustidan ishlashda davom etamiz. Eng asosiysi tomoshabop bahsda muhim g'alabaga erishib, kubokda nimchorak final bosqichiga chiqa olganimizdan juda xursandmiz.

- Ikkinchi bo'limda Faxriddin Alimovning maydonga tushirilishi o'yin tizginini o'zgartirib yubordi. “Dubl”ini rasmiylashtirgan bu futbolchi sizda “yashirin qurol”midi yoki majburiy o'zgarishmidi?

- Ochig'ini aytsam, Faxriddin “yashirin qurol” emas, majburiy o'zgarish edi. Bunaqa yomg'irli ob-havoda ikkinchi bo'limda tezligi yaxshi bo'lgan yangi kuchni maydonga tushirishimiz shart edi. 18 yoshli Faxriddin hali umrida birinchi bor bunday katta bahsda, muhitda maydonga tushdi. Yaxshi tezligi evaziga ikkita goli bilan g'alabaga katta hissa qo'shdi. Bugun uning kuni ekan, o'z so'zini ayta oldi. Yomg'irli ob-havoda haqiqiy futbol atmosferasi yuzaga keldi, muxlislar ham 5 ta gol ko'rib, chiroyli futbol guvohi bo'lishdi. G'alaba bilan samarqandlik muxlislarni tabriklaymiz.

- O'tgan uchta o'yinda ham «SHerdor» “validolli o'yin namoyish etdi – «Labsa» bilan 1:1 va penaltilar seriyasi 7:6, «Nurafshon» bilan 2:3, «Xorazm» bilan esa 3:2. Tomoshabop o'yindan siz murabbiy sifatida qoniqayapsizmi?

- CHindanam, har o'yinimiz hujumlar va gollarga boy o'tmoqda. Raqibni kuchli ishtiyoq evaziga mag'lub etdik. Tarkibimiz yosh, jamoamiz hali yangi bosqichga chiqqanligini his qilolmayapti. SHu bois ko'p kuch sarflab hujumkorlikka zo'r berayapmiz, himoyalanayapmiz, ammo natijamiz barqaror bo'lmayapti. SHu bois, asosan ishtiyoq, maydondagi “jang”, keskin kurashlar evaziga g'alaba qozonayapmiz. Ammo o'yinni o'z vaqtida nazorat qilishni ham bilishimiz kerak. O'ylaymanki, Pro-Liga 5-turlaridan keyin jamoamizning o'yini barqarorlashadi. Jamoa ishtiyoqidan qoniqayapman, ammo hali o'yinimizdan emas. Hali ko'p ishlashimiz kerak. Tarkibimizni Samarqandning barcha tumanlaridan kelgan futbolchilar bilan shakllantirganmiz. Bunday o'yinlar bilan sekin-asta tajriba yig'iladi. Bizni qo'llab-quvvatlayotgan muxlislarga minnatdorchilik bildirib qolaman.

Usmon IBODOV yozib oldi.