Anzur Ismoilov: "Kuper bizga oldin himoyada o'ynashni o'rganinglar deyapti"

Bugun futbolchilarimiz KXDRga qarshi to'p tepishadi. "Milliy" ("Bunyodkor") stadionida kechadigan bahs soat 19:00da start oladi. Ushbu o'yindan oldin tayyorgarlik va boshqa mavzular haqida terma jamoamiz himoyachisi Anzur Ismoilovdan intervyu oldik.

- KXDR bilan o'yinga tayyorgarlik qanday bo'ldi?
- Bir haftadan beri shu o'yinga tayyorgarlik ko'rdik. Hammasi joyida. O'ylaymanki, mashg'ulotlar yaxshi kechdi, endi o'yinda o'zimizni ko'rsatib g'alaba qozonishni xohlaymiz.

- Bosh murabbiy Ektor Kuper futbolchilardan asosan nimani xohlayapti?
- Birinchi navbatda tartib-intizomni va hamma o'ziga belgilangan joyda o'ynashini. Kuper doim mening aytganimni qilinglar deydi. U himoyaga katta etibor qaratyapti. Mustahkam himoyalanishimiz kerak deydi. Kuperning nazdida har bir futbolchi o'ziga yuklatilgan vazifani bilishi kerak. Keyin bu murabbiyga o'yin paytida o'z bilganicha oldinga chiqib ketgan futbolchilar yoqmaydi.

- Sizningcha, KXDR qanchalik jiddiy raqib?
- Bu jamoani ko'pincha yutib kelganmiz, lekin yaxshi raqib deb o'ylayman.  

- Milliy terma jamoamiz 10ta o'yindirki g'alaba qozona olmayapti. Bu narsa futbolchilarni xavotirga soladimi?
- Albatta, biz ham bundan xafa bo'lamiz. Jamoadoshlar o'zaro yig'ilganda shu haqda gap boradi va yutishimiz kerak deymiz. Lekin hozirgi mashg'ulotlardan kelib chiqsak, etibor ko'proq himoyaga qaratilyapti. Kuper bizga oldin himoyada o'ynashni o'rganinglar, keyin yarim himoya, undan keyin hujumda o'ynashni o'rganasizlar dedi.

- Osiyo Kubogigacha hujumda qanday o'ynashni o'rganishga vaqt etarmikan?
- Endi bilmadim. Hali oldimizda yana 4-5ta o'rtoqlik uchrashuvi bor. SHu o'yinlarda boshqacha usulni sinab ko'rsak kerak. Lekin sekin-asta himoyaviy futbolni o'rganyapmiz. Ektor Kuper qo'l ostida ikkita yig'inda qatnashgan bo'lsak, ikkalasida ham urg'u himoyaviy futbolga qaratildi.

- Mashg'ulotlarni kuzatganimizda Kuper himoyachilarni chaqirib olib sizlar bilan alohida ishlayapti.
- Ha, uning asosiy maqsadi kuchli himoyani shakllantirib olish. Undan keyin yarim himoya va hujum haqida o'ylasak kerak.

- Futbolchilar murabbiyning o'yin uslubini qanday qabul qilishdi?
- Endi biz maydondagi o'yinchilarimiz. Murabbiy nima desa shuni bajarishga harakat qilamiz. Kuper faqat "orqada yotinglar" deyayotgani yo'q. Kerak paytda hujumga ham o'tinglar, biroq himoya aslo esdan chiqmasin deyapti.

- Murabbiy tanlagan taktika tezroq natija ko'rsatishga qaratilgan. SHundan kelib chiqib Osiyo Kubogida ijobiy natija kutsak bo'ladimi?
- Albatta, biz ham shunga harakat qilamiz. Murabbiyimiz hech kimga etibor bermasdan faqat mening aytganimni qlinglar, menga ishoninglar deyapti. Natijada biz ham unga ishonib mashg'ulotlarda ishlayapmiz. 

- Bizning futbolchilarga to'psiz futbol o'ynash qiyin emasmi? Bunga ayniqsa himoyachilar jismoniy jihatdan dosh bera oladimi?
- Suriya bilan kechgan birinchi o'yinga chiqqanimizda ham etiborni himoyaga qaratdik. Ektor Kuper sizlarni himoyada qanday to'p tepishingizni ko'rmoqchiman dedi. Endi hozir futbol o'ynash hammaga qiyin. Lekin biz ham harakat qilamiz. 

- KXDR va Qatar bilan bo'ladigan o'yinlarda natija muhimmi?
- Albatta, o'z muxlislarimiz qarshisida g'alaba qozonishni xohlaymiz. Lekin murabbiy bizga natijani umuman o'ylamanglar, faqat mening aytganimni bajaringlar dedi.

X.Xoliqov va SH.Beg'amov suhbatlashdi.