Islom Ismoilov: "Marushich ham, Perica ham yuqori darajadagi hujumchilar"

- O'yin haqida fikrlaringiz...

- Hammaga salom. Avvalo, barchani g'alaba bilan tabriklayman! O'yinga kelsak, albatta 1-tur bahsi oson o'tmasligi aniq edi. Uchrashuvdan oldin ko'pchilik "Mashal"ga past baho bergandi. 

1 hafta davomida futbolchilarga bu bo'yicha to'g'ri ko'rsatmalarni berib keldik. Sababi "Mashal" ham bu yil tarkibni shakllantirishda bir qator legionerlarni taklif etdi, murabbiyi o'zgardi. Shu narsalarni hisobga olgan holda tayyorgarlik ko'rgandik. Ko'p ishlanmalarimiz o'yinda ish berdi.

- Bugungi uchrashuvdan qay darajada ko'nglingiz to'ldi? Jamoa sizning taktik sxemangizda muvaffaqiyatli o'ynay oldimi yoki qo'shimcha o'zgartirishlar kiritish kerakligini his qildingizmi?

- Murabbiy hech qachon o'z o'yin uslubidan 100% qoniqmaydi. Kamchiliklarimiz bor, ammo g'alaba qozonish yoqimli. O'yindagi hamma qulay vaziyatlarni golga aylantirganimiz, hisob bundan-da yirik ko'rinish olishi mumkin edi. Ammo yigitlar biz xohlayotgan narsani bajarishga harakat qilmoqda.

- "Neftchi" uchun "Mashal" noqulay jamoa edi. O'tgan yili "Neftchi"ni Kubokdan chiqarib yuborgan. Sizni g'alaba bilan muborakbod etmoqchiman. Ikrom Aliboevning holati haqida malumot bersangiz. U "Andijon" bilan o'yingacha safda bo'ladimi?

- Ikrom Aliboevning jarohatini u qadar jiddiy deb bo'lmaydi, lekin muskullarida tortishish kuzatilgan. Shifokorlar uning tiklanishi uchun kamida 10 kun vaqt kerakligini aytgan. O'ylaymanki, "Andijon" bilan bahsga qadar safga qaytadi.

- Stipe Perica asosiy tarkibda maydonga tushishini ko'pchilik kutmagandi. Hamma ko'proq Marushichni kutgandi. Ammo qaroringiz o'zini oqladi. Shu haqda nima deya olasiz?

- Albatta, Marushich ham, Perica ham yuqori darajadagi hujumchilar. Ular bir-birining o'yinini to'ldira oladi. Biz "Mashal"ning o'rtoqlik uchrashuvlaridagi o'yinlarini tahlil qilib chiqdik va ularda standart vaziyatlar bo'yicha kamchilik borligini payqadik. Shu bois Perica bosh bilan yaxshi o'ynashini hisobga olib, uni boshlang'ich tarkibda tushirdik va bu o'zini oqladi. U ikkita standartdan bittasidan unumli foydalandi. O'ylaymanki, hujumchilar o'rtasidagi raqobat davom etsa, bu faqat ularning o'ziga foyda bo'ladi.

- Botirali Ergashev ko'p bor oldinga chiqqaniga guvoh bo'ldik. Bu holatdan "Mashal" foydalana olmadi. Shu narsa boshqa o'yinlarda pand bermaydimi?

- Jamoamiz ancha yuqorida harakat qilmoqda. Orqada juda katta bo'shliq paydo bo'lmoqda. Shu tufayli darvozabon o'yin davomida tavakkalga qo'l urib, o'sha bo'shliqni to'ldirishga majbur. Buning aksi bo'lsa, raqib bundan foydalanib ketishi mumkin. Xohlaymizmi-xohlamaymizmi, yuqori chiziq bo'yicha o'ynasak, bu narsaga ko'nikishimiz kerak. Darvozabon bu holatda so'nggi himoyachi sifatida joyni to'ldiradi.

- O'tgan yili "Neftchi" uzoq yil kutilgan chempionlikni qo'lga kiritdi. Siz juda masuliyatli lavozimni egalladingiz. Siz bu jamoani chempion qilsangizgina, o'tgan yilgi natijani qayd etgan bo'lasiz. Shu haqda fikr bildirsangiz...

- "Neftchi" bosh murabbiyi bo'lish — men uchun sharaf. Jamoa oldiga yuqori maqsad qo'yilgani ham har bir murabbiyga motivaciya beradi. Hech qachon bu kabi holatlardan qo'rqmaganman. Sababi necha yildan buyon futbol ichidamiz. Bu narsa bosim o'tkazmaydi, aksincha, oldiga katta maqsadlarni qo'ygan jamoada ishlashni xohlaganman. "Neftchi" tomonidan berilgan taklif meni har tomonlama qoniqtirdi. Maqsadimiz — chempionlikni himoya qilish va Elit OCHLda munosib qatnashib, tarix yaratish. Bu yil chempionat oson bo'lmaydi, lekin biz harakat qilamiz. Umuman qo'rquv his qilmayapman. Jamoaga ishonaman, qo'l ostimdagi futbolchilar O'zbekistondagi eng yaxshilari. Ular bilan yana chempionlikka erishamiz.

- Hakam hushtagi yangraganidan so'ng sizda ko'zyoshlar qalqib chiqqandek bo'ldi. Bu nima bilan bog'liq edi? 

- Bu sizga shunday ko'ringandir (kuladi). Bo'lishi mumkin.

- Farruh Sayfiev tushganidan so'ng Ibrohimhalil Yo'ldoshev bilan bir qanotda bo'lib qoldi. Bu oldinga yurishmidi?

- O'yin oxirida tempni yanada oshirmoqchi bo'ldik. Xurshid G'iyosovni hujumchi ortiga qo'yib, Ibrohimhalilni qanotga qo'ydik. Biz ko'proq gol urishni xohladik. O'ylaymanki, bizda shundan keyin qulay vaziyatlar tashkil etildi. Futbolchilarga yangi g'oya va taktikaga moslashish uchun vaqt talab etiladi. Hammasi birdaniga ro'y bermaydi.

- Ijtimoiy tarmoqlarda ko'pchilik Farruh Sayfievni o'ng qanot himoyasida o'ynatishingiz haqida taxminlar bildirdi. Sizda Farruhni o'ngga, Ibrohimni chapga qo'yish rejasi bormidi?

- Farruh Sayfiev juda tajribali futbolchi va ikki qanotda ham birday o'ynay oladi. Bundan tashqari Izzatillo Po'latov ham bor edi. Biroq biz bu nuqtada Muhsin Ubaydullaevni o'ynatishga qaror qildik. Ularning barchasi asosiy tarkibda o'ynashga loyiq futbolchilardir.

- Stadiondagi muxlislik haqida fikringiz...

- Farg'onada muxlislik doim yuqori darajada bo'lgan. Ular o'yinga bizdan ham ko'p tayyorgarlik ko'rgan deb ayta olaman. Ularning qo'llab-quvvatlashi bizga kuch beradi. Futbol muxlislar bilan go'zal. Bizning oliy maqsadimiz — Farg'ona xalqini xursand qilish.