"Al Ittihod" safiga qaytgan Benzemadan sardorlik bog'ichi olib qo'yildi, "Al Ayn" esa Erkinov jamoasini kubokdan chiqarib yubordi
20 fev 2024 01:37
Yangiliklar

"Al Ittihod" safiga qaytgan Benzemadan sardorlik bog'ichi olib qo'yildi, "Al Ayn" esa Erkinov jamoasini kubokdan chiqarib yubordi

Bir necha kundan so'ng Osiyo CHempionlar ligasi chorak finalchilari aniqlanadi.

Turnirning nimchorak finalida O'zbekiston sharafini ikki klub — "Nasaf" va "Navbahor" himoya qilmoqda. Ikkala jamoa ham o'z muxlislari qarshisida o'tgan ilk bellashuvlarda nursiz durangga rozi bo'lishdi. Endilikda o'zbek klublari safar o'yinlarida maydonga tushishadi. Jumladan, "Nasaf" Birlashgan Arab Amirliklarining "Al Ayn" klubi mehmoni bo'lsa, "Navbahor" Saudiya Arabistonining "Al Ittihod" jamoasi bilan to'qnash keladi.

Bo'lajak uchrashuvlar oldidan O'zbekiston klublarining raqiblaridagi vaziyat to'g'risida malumot taqdim etamiz.

"Al Ayn"

"Nasaf"ga qarshi javob uchrashuvi oldidan amirlik jamoasi Prezident kubogi 1/8 finalida o'zbekistonlik yarim himoyachi Hojimat Erkinov to'p tepayotgan "Al Vahda"ga qarshi bahs olib borib, Matias Palasiosning 87-daqiqada urgan goli evaziga g'alaba qozondi. "Al Vahda" tarkibida Hojimat Erkinov uchrashuvda to'liq harakat qildi va 75-daqiqada hakam tomonidan ogohlantirildi.

SHuningdek, "Al Ayn" jamoaning asosiy va vice-sardorlari — Bandar Al Ahbabi va Xolid Eysa bilan amaldagi shartnoma muddatini uzaytirdi. Biroq yangi bitim muddati oshkor qilinmadi.

Eslatib o'tamiz, "Al Ayn" — "Nasaf" uchrashuvi 21 fevral kuni Toshkent vaqti bilan soat 21:00 da boshlanadi.

"Al Ittihod"

Marselo Galyardo shogirdlari "Navbahor"ga qarshi javob o'yini oldidan Saudiya Arabistoni chempionatida "Al Riyod"ga qarshi maydonga tushib, Hamdallahning dubli evaziga 2:0 hisobida g'alaba qozondi.

Mazkur bahsni Namanganga olib ketilmagan jamoa yulduzi Karim Benzema asosiy tarkibda boshladi va 71-daqiqada almashtirildi.

SofaScore portali bergan bahoga ko'ra, Benzemaning xatti-harakatlari 6,3 ballga loyiq ko'rilgan va bu "Al Ittihod" boshlang'ich tarkibi va zaxiradan o'yinga qo'shilganlar ichida eng yomon ko'rsatkich bo'lgan.

So'nggi yangilklarga ko'ra, jamoaning argentinalik bosh murabbiyi Marselo Galyardo Karim Benzemani sardorlik bog'ichidan mahrum qilgan. "Al Riyod" bilan o'yinda jamoani misrlik himoyachi Ahmad Xegazi maydonga boshlab tushgan.