Akbar Ismatullaev va "Dinamo" ishi O'FA qo'mitasiga oshirildi

Samarqandning "Dinamo" klubi 2023 yilning 15 dekabr sanasida futbolchi Akbar Ismatullaev bilan 1 yillik shartnoma imzolagan bo'lib, mazkur shartnomani “Superliga va Proliga reglamenti”da belgilangan limitdan tashqari 17 dekabr kuni PFL ro'yxatidan o'tkazgan. 18 dekabr kuni esa qishki transfer oynasi ochilgan.

Biroq "Dinamo" qishki transfer oynasi yopiladigan 24 fevralga qadar Akbar Ismatullaevni musobaqalar uchun ro'yxatga kiritmadi. Yani, futbolchining "Dinamo" bilan amalda shartnomasi bor bo'lsa-da, u PFL tomonidan o'tkaziladigan musobaqalarda ishtirok eta olmaydigan bo'ldi. Vaholanki, mehnat shartnomasining 4.1.3-bandida futbolchining murabbiylar qo'l ostida mashg'ulot o'tkazishi hamda musobaqalardagi ishtirokini taminlash "Dinamo" majburiyatlaridan biri sifatida ko'rsatilgan.

Futbolchi sifatidagi asosiy huquqi poymol qilingach, Ismatullaev O'zbekiston futbolchilari uyushmasiga shikoyat kiritdi. SHu asosda 29 fevral kuni "Dinamo" futbolchi FIFA nizomlari asosida shartnomani bir taraflama bekor qilishi mumkinligi to'g'risida ogohlantirish xati oldi, ammo uni belgilangan muddat ichida javobsiz qoldirdi. Natijada Istamullaev joriy yilning 7 mart kuni "Bunyodkor" klubi bilan shartnoma imzoladi.

“Futbolchilar maqomi va transferi bo'yicha reglament”ning 6.1-bandida shartnomasi uzrli sabab bo'yicha tugagan professional futbolchi istisno tariqasida ro'yxatdan o'tkazish davridan tashqari ro'yxatdan o'tkazilishi mumkinligi, Associaciya bunday professional futbolchini ro'yxatdan o'tkazishga tegishli musobaqaning sport yaxlitligiga etarlicha diqqat-etibor qaratish shartida ruxsat berishi mumkinligi belgilangan. SHundan kelib chiqib, uyushma Akbar Ismatullaevga "Bunyodkor" tarkibida musobaqalarda ishtirok etishga ruxsat berish masalasida yordam so'ragan.

PFL mazkur holatni o'rganib chiqib, ishni O'FA tegishli qo'mitasiga oshirishga qaror qildi.