Abbosbek Fayzullaev Turkmanistonga qarshi o'yin va CSKAdagi o'zgarish haqida gapirdi

– Abbosbek, Turkmanistonga qarshi o'yin haqida nima deya olasiz?

– Turkmanistonga qarshi o'yin qiziqarli bo'ladi deb o'ylayman. Vazifani uddalab bo'lganimizga qaramay, muxlislarimiz yonida o'ynaymiz. Ularga yoqadigan o'yin ko'rsatishga harakat qilamiz. Uch ochkoni qo'lga kiritmoqchimiz. 

– CSKAda may oyi o'yinchisi bo'ldingiz. Umuman Rossiyada siz haqingizda juda ko'p ijobiy fikrlar mavjud. Kelajagingiz haqida nima deya olasiz?

– Kelajagim haqida hech narsa deya olmayman. CHunki CSKA bilan shartnomam bor. Hozir terma jamoadaman, asosiysi bu erda ikkita o'yinni o'tkazib olishim. 

– CSKAda murabbiy o'zgardi. SHu haqida fikringiz?

– Buni kecha bildim. Klub shu qarorga kelgan ekan, men hech narsa deya olmayman. Fedotov bilan ishlaganimdan juda xursandman. Turkiyadagi yig'inlarda jamoaga qo'shilib ketishimga ham asosiy sababchi aynan u bo'lgandi. 

– Rossiyada yangi mavsum iyul oyidan boshlanadi. Bu Olimpiadaga borishingizga to'siq bo'lmaydimi? Bu masala bo'yicha biror kelishuvga erishdingizmi?

– Bu masala haqida gaplashmadik. Federaciya va klub kelisha olsa, Olimpiadaga borish niyatidaman. 

– Ertaga "Bunyodkor" stadionida o'ynaymiz. Bu stadionda U-20 Osiyo kubogida g'alaba qozongansiz. Muxlislarga biror chorlov bormi?

– Terma jamoaning har bir o'yini muxlislar uchun bayram hisoblanadi. Ertaga ham kelib, qo'llab-quvvatlab turishsa, xursand bo'lardik. Qancha ko'p muxlis kelsa, bu bizga qo'shimcha kuch bo'ladi. 

– Abdurahmon Fozilov bilan iPhone masalasida nima bo'lgandi?

– SHart bor edi. U shartni bajarmadim. Ertaga shu shartni bajarishga harakat qilaman.