"Andijon" yig'iniga 3 nafar legioner qo'shildi

"Andijon"ning Antaliyadagi ikkinchi kungi mashg'ulotlari ham reja asosida davom etyapti. 

Kecha kechki payt "Andijon"ga uch nafar legioner qo'shildi. Ukrainalik darvozabon Igor Litovka, ukrainalik yarim himoyachi Levan Arveladze va gruziyalik yana bir yarim himoyachi Nodar Kavtaradze klub ixtiyoriga etib keldi.

Igor Litovka – 1988 yilda tavallud topgan ukrainalik tajribali darvozabon. Uning oxirgi klubi Xorvatiyaning "Zagora" jamoasi hisoblanadi. Faoliyati davomida Ukrainaning turli jamoalarida, shuningdek, Latviyaning "Riga" klubida harakat qilgan. U Ukraina Birinchi ligasining ikki karra g'olibi sanaladi.

Levan Arveladze – 1993 yilda tug'ilgan ukrainalik yarim himoyachi. Bungacha Gruziyaning "Torpedo" Kutaisi klubi sharafini himoya qilgan. SHuningdek, u Ukrainaning turli klublarida o'ynagan. Ukraina Birinchi ligasining kumush hamda bronza medallari sohibi sanaladi.

Nodar Kavtaradze – 1993 yilda tavallud topgan rossiyalik yarim himoyachi. Tajribali o'yinchining so'nggi jamoasi Kutaisining "Torpedo"si sanaladi. U faoliyati mobaynida Rossiya, Vengriya va Gruziya jamoalarida to'p tepgan.