25-turda hakamlar xato qilishdimi? Ekspertimiz tahlili davomida bir nechta bahsli vaziyatlar yuzaga keldi

"Surxon" – "Dinamo" (VIDEO)

Ko'k libosdagi o'yinchi to'p uchun kurashishga ulgurmasdan, odatiy qoidabuzarlikni amalga oshirdi. Penalti to'g'ri belgilandi.

"Qo'qon-1912" – "Bunyodkor" (VIDEO)

Agarda qo'pollik sodir etilmaganda, hujum qilayotgan tomon 3 ga 2 o'yinchi nisbatida ustunlikka ega bo'lardi, bu esa xavfli vaziyat sodir etilishiga zamin yaratardi. Xavf tug'dirishi mumkin bo'lgan hujumni buzgani uchun sariq kartochka to'g'ri ko'rsatilgan.

"Qo'qon-1912" – "Bunyodkor" (VIDEO)

Oq libosdagi himoyachi to'pni burchak tomon tepib yuboradi, keyingi harakatlar esa tabiiy jarayon hisoblanadi, sababi bu to'qnashuvdan qutulishning iloji yo'q edi, shu bois o'yin davom ettirilishi lozim.

"Nasaf" – "Neftchi" (VIDEO)

Hakam yaxshi holatda bo'lsa-da, avvaliga hech qanday kartochka ko'rsatmagani ajablanarli. Vaziyatni aniq baholash qiyin, menimcha, qo'pollik qizil kartochkaga yaqinroq edi. Oyoqning kaft qismi ko'tarilgan holda raqibga tashlanilgan. Bu holatda qizil libosdagi o'yinchi oyog'ining himoyalanmagan qismiga jarohat etkazishi mumkin edi. SHuningdek, u raqibning tayanch oyog'iga tashlandi, bu esa jarohat olish imkoniyatini oshiradi.

"Nasaf" – "Neftchi" (VIDEO)

Idrok qilish qiyin bo'lgan vaziyat. Birinchidan, darvozabon salomatligi uchun xavfli ravishda boshini quyi eggancha to'pga tashlandi. Hujumchi birinchi bo'lib to'pga o'ynagani uchun darvozabon jazolanishi kerak. Hujumchi oyog'ini normal balandlikka ko'tardi. Lekin bu erda sariq kartochkadan boshqa narsa haqida gapirib bo'lmaydi, bunga hech qanday mezon yo'q.

"Paxtakor" – "Qizilqum" (VIDEO)

Golni aniqlash texnologiyasisiz bu vaziyatni aniq baholab bo'lmaydi, ammo ikkilamchi belgilar himoyachining chap oyog'i chiziqda ekanligini ko'rsatadi, lekin o'ng oyoq esa darvoza ichkarisida edi va to'p aynan o'sha erdan qaytarildi. Himoyachidagi o'ng oyoq holatidan kelib chiqib, to'p darvoza chizig'ini kesib o'tganini taxmin qilish mumkin.