23 yoshli darvozabon, OKMKni yutgan murabbiy va futbolchi, "Bunyodkor"ga supergol urgan himoyachi - Superligada 27-turning eng yaxshilari

Championat.asia sayti talqiniga ko'ra, 27-turning eng yaxshi darvozaboni – Shohruh Isoqov ("So'g'diyona")

"So'g'diyona" ushbu tur o'z maydonida "Qizilqum"ni qabul qildi va 3:0 hisobida g'alaba qozondi. Mazkur g'alabada jizzaxliklar darvozaboni Shohruh Isoqovning hissasi beqiyos. 23 yoshli darvozabon uchrashuv mobaynida 4 ta seyv ko'rsatdi, shulardan 2 tasi jarima maydoni ichidan yo'llangan zarbalar edi. Championat.asia sayti xodimlari muhokamadan so'ng markaziy uchrashuvda o'zining ijobiy xislatlarini namoyon etgan Isoqovni turning eng yaxshi darvozabonligiga loyiq ko'rdi.

Championat.asia sayti talqinida 27-turning eng yaxshi murabbiyi – Asror Aliqulov ("Sho'rtan")

"Sho'rtan" yakunlangan turda o'z uyida Mirjalol Qosimov qo'l ostidagi OKMKni mehmon qilib, 4:3 hisobida dog'da qoldirdi. Uchrashuv shu hisobda yakun topishida g'uzorliklar murabbiyning uchrashuv uchun ishlab chiqqan rejasi ish berganidan dalolatdir. Musobaqa jadvalida so'nggi pog'onada borayotgan "Sho'rtan" sovrinli o'rinlar uchun kurashyotgan OKMKni taslim qila oldi. Shu tariqa, o'z uyida g'alabani tantana qilgan "Sho'rtan" ustozi Asror Aliqulov turning eng yaxshi murabbiyi deb topildi. 

Championat.asia sayti talqiniga ko'ra, 27-turning eng yaxshi futbolchisi – Po'latxo'ja Xoldorxonov ("Sho'rtan")

"Sho'rtan" OKMKni mag'lub etishida jamoa hujumchisi Po'latxo'ja Xoldorxonov katta sahnaga chiqdi. 22 yoshli futbolchi ushbu bahsda dubl qayd etdi. Ayniqsa, uning birinchi goli katta mehnat evazig urildi. Shunday qilib, Po'latxo'ja Xoldorxonov Championat.asia ijodiy guruhi tomonidan tur futbolchisi deya etirof etildi.

Championat.asia sayti talqinida 27-turning eng chiroyli goli muallifi – Hojiakbar Alijonov ("Paxtakor")

"Paxtkor" bu tur Toshkent derbisida "Bunyodkor" jamoasini 4:2 hisobida mag'lubiyatga uchratdi. Uchrashuvning 12-daqiqasida "sherlar" himoyachisi Hojiakbar Alijonov "Bunyodkor" darvozasiga supergol urdi. U o'ng oyog'ining tashqi tomoni bilan Valijon Rahimov qo'riqlayotgan darvozaning yuqori burchagini aniq nishonga oldi. Ushbu gol muallifi Alijonov tur goli muallifi sifatida etrof qilindi.