- Ўйин ҳақида фикрингиз?
- Қўлдан келганча ўйнадик. Биринчи тайм қувноқ ўтди, дарвозаларга бешта тўп киритилди. Иккинчи бўлимда эса гол бўлмади.
- Учинчи голдан кейин ўйин тугади деб ҳисоблайсизми? Чунки ҳали олдинда иккинчи бўлим бор эди.
- Биринчи таймнинг ўзида иккита гол уриб учта ўтказсанг барибир бу ҳам таъсир қилади. Майдонда футболчилар ўйнайди, улардан сўраш керакдир, нега бундай бўлганини.
- Мезбон жамоа мухлислари майдонга лента отгани ҳам ўз таъсирини кўрсатдими?
- Биз меҳмонда ўйнадик, яна нимаям дердим. Наманганда кўпинча шундай бўлади. Балки Самарқандда биз ҳам шунақа қилармиз.
- Жамоангиз тезкор гол урди, шу билан бирга тезкор гол ўтказди.
- Ўзимизнинг хато сабаб гол ўтказдик. Ҳимояда бундай ўйнамаслигимиз керак эди. "Навбаҳор"нинг бир нафар футболчисини тўртта ҳимоячимиз ўтказиб юборди. Дарвозабон тўпни узоққа тепяпти, рақиб футболчиси бирга бир чиқиб боряпти.
- Кўрсатмаларингизни футболчилар тўлиқ бажаришдими?
- (кулиб) Агар 2:3 ҳисобида мағлубиятга учраган бўлсак, демак кўрсатмалар бажарилган. Жиддий айтадиган бўлсам, хатоларга йўл қўйдик. Мен бундай хатоларни кутмагандим. Сафарда иккита гол уриш яхши, лекин учта гол ўтказганимизни тушунмаяпман.
- Жумабоев гол урганидан сўнг голни нишонлаши мухлислар ҳайқириғига сабаб бўлди.
- Мен буни ўзига ҳам айтдим. Голни нишонлаб кераксиз жойда сариқ карточка олди. Лекин футболчиларимиз мухлислар босимига тушиб қолишди деб ўйламайман. Бугун мухлислар босимидан ҳам каттароқ босимга дуч келдик. Бу босим ўйинга кўпроқ таъсир кўрсатди. Фақат бу ҳақда гапиргим келмаяпти. Бизнинг ўйинчилар "сариқ" оляпти, лекин "Навбаҳор" футболчиларига "сариқ" беришмаяпти. Бу ғалати. Бир вазиятда Азизбек Амоновга нисбатан очиқчасига қўполлик ишлатилди, лекин ҳеч қанақа чора кўрилмади.
- "Динамо" 11 йилдирки "Навбаҳор"ни хоҳ уйда, хоҳ сафарда енга олмаяпти. Балки бу ҳам таъсир қилгандир?
- Билмадим, агар шуни ўйиндан олдин айтганингизда бугун ютган бўлардик. Лекин ваъда бериб айтаман, кейинги сафар "Навбаҳор" билан қаерда ўйнасак, ғалаба қозонамиз.
- Энди ФИФА кунлари сабаб танаффус бўлади. Жароҳат олган футболчилар сафга қайтадими?
- Биз ҳам шунга умид қилиб қоламиз.
