- Ўйин ҳақида фикрингиз?
- Оғир, шу билан бирга қизиқарли ўйин гувоҳи бўлдик. Учрашув битта хатогача кечди. Афсуски, биз хатога йўл қўйдик ва мағлуб бўлдик. "Андижон"ни ғалаба билан табриклайман ва кейинги ўйинларида омад тилайман.
- "Хоразм" баҳс бошидан беш нафар ҳимоячи билан ўйнади. Иккинчи таймда тўрт нафар ҳимоячини қолдириб, ярим ҳимояни кучайтирса бўлмасмиди?
- Ўйлашимча, биз биринчи бўлимни ёмон ўтказмадик. Беш нафар ҳимоячи билан ўйнаганимиз эътиборни ҳимояга қаратамиз дегани эмасди. Чунки биз тўрт нафар футболчини олдинда прессингга қолдирдик. Тўғри, иккинчи таймда анча орқага қайтиб ҳаракат қилдик, сабаби футболчиларимиз тез толиқиб қолишди. Буни сунъий майдондан бирданига табиий майдонга ўтиш қийинлиги билан изоҳлаган бўлардим. Шу жиҳатдан бизга тетиклик етишмаяпти, боз устига жароҳат олган футболчиларимиз бор. Лекин ҳимоявий ўйин режамизда йўқ эди.
- "Хоразм" кучли клублар билан яхши ўйнаяпти, лекин ўртамиёналар билан негадир ўзини кўрсата олмаяпти.
- Ўртамиёна жамоалар деганда кимларни назарда тутяпсиз? "Андижон" ўртамиёна жамоами? Агар бу таркиб билан ўртамиёна десак, унда биз умуман узоқдамиз. "Андижон"да яхши футболчилар кўп, легионерлари ҳам кучли. Яхши мураббий ишлаяпти. Менимча, "Андижон" бу таркиб билан бемалол совринли ўринлар учун кураша олади. Боаке, Черан - булар ўзимизнинг чемпионатда топ футболчилар ҳисобланади.
- Захирадан тушганлар ўйинни қанчалик кучайтира олди?
- Тўғрисини айтсам, улардан кўпроғини кутгандим. Лекин бундай бўлиб чиқмади ва озгина умидимиз сўнди. Ўйинни кучайтиришни мақсад қилгандик, афсуски ўхшамади.
- Дарвозабон Никола Стошич нега майдонга тушяпти?
- Чунки биз Умиджон Эргашевни таклиф қилдик, у ўзини яхши кўрсатяпти. Стошич эса ҳозирча рақобатда ютқазяпти.
