- Ғалаба билан барча мухлисларимизни табриклайман. "Пахтакор" майдонида ғалаба қозониш, албатта, жуда-жуда ёқимли ҳолат. Бунинг учун кўп меҳнат қилдик. Бугун майдонда ҳақиқий "Нефтчи"ни кўрдик. Футболчилар характер кўрсатишди ва ўйлайманки, ишончли ҳамда муносиб ғалабани қўлга киритдик. Ушбу ғалаба билан Фарғонадан келиб, стадионда бизни қўллаб-қувватлаган барча мухлисларимизни, шунингдек, бизга бефарқ бўлмаган барча инсонларни табриклайман.
- Биринчи таймда "Нефтчи"нинг ҳаракатлари унчалик ўхшамади, деса ҳам бўлади. "Пахтакор"га гол уриши учун имкониятлар берилди. Бунинг сабаби нимада? Танаффусда нимани ўзгартирдингизки, иккинчи таймда "Нефтчи" қанотларда ҳам, умуман, бошқача ҳаракат қилди?
- Биринчи таймда эҳтиёткорроқ футбол кўрсатишга ҳаракат қилдик. Сабаби, бундай учрашувларда натижа биринчи ўринга чиқади. Биринчи даврада, жуда чиройли ўйинлар ўтказдик, ҳужумкор футбол намойиш этдик. Афсуски, футболда бундай жиҳатлар ҳар доим ҳам қадрланавермайди. Лобановский анча йиллар олдин айтганидек, ўйин унутилади, натижа эса тарихда қолади. Шунинг учун ҳар доим ҳужумкор ўйнаб, ғалаба қозониб бўлмайди. Охирги пайтларда бу борада жуда кўп танқидлар бўлди, эътирозлар билдирилди. Жамоа ҳимояда кўп гол ўтказиб юбораётгани, ҳимояни тўғрилаш кераклиги ҳақида кўп гапирилди. Бундай фикрлар, хоҳлаймизми-йўқми, инсонга таъсир қилади. Бу омилларни ҳисобга олдик. Ушбу ўйинда очко йўқотишга ҳаққимиз йўқ эди. Ҳеч бўлмаса, бир очко олишимиз керак эди, чунки "Пахтакор"нинг бизни ортда қолдириб кетишига йўл қўймаслигимиз лозим эди. Бу руҳият ва психология билан ҳам боғлиқ. Ўйиндан олдин футболчиларга 3-4-3 схемаси ҳимоявий эмас, аслида ҳужумкор схема эканини тушунтирдик. Шунга қарамай, ўйин бошида рақибда ҳам, бизда ҳам имкониятлар бўлди. Пенальтидан кейин эса ўйин ўзгариб кетди. Шундан сўнг схемани ўзгартириб, 4-3-3 тизимига ўтдик. Иккинчи таймда режамизга мувофиқ қанотларни кучайтиришни мақсад қилгандик. Чунки "Пахтакор" ҳисоб дуранг бўлиб турганида, одатда, 60-дақиқалар атрофида ўзгаришлар қилади ва олдинга кўпроқ ўта бошлайди. Шуни ҳисобга олиб, Алишер Одилов ва Аброр Исмоиловни иккинчи таймда майдонга туширишни режалаштиргандик. Улар майдонга тушишди ва биз ўзимиз кўникиб қолган 4-3-3 схемасига қайтдик. Ўйлайманки, иккинчи таймда рақибга деярли ҳеч қандай имконият қолдирмадик.
- Ислом ака, ғалаба билан табриклайман. Гапларингиздан келиб чиқиб, бугунги учрашувни чемпионлик учун ҳал қилувчи, марказий ўйин деб ҳисоблаш мумкинми? Бундай муҳим баҳсда Ислом Исмоилов ўзининг футбол фалсафасидан воз кечиб, ўтган йили "Нефтчи" қўллаган тактикага қайтди, деган фикрга қўшиласизми? Чунки уч ҳимоячи билан ўйнаганда жамоа бутунлай бошқача футбол намойиш этади.
- Йўқ. Масалан, 3-4-3, 4-3-3 ёки 5-3-2 — булар футболчиларнинг майдонда қандай жойлашувини англатадиган схемалар, холос. Жамоанинг футбол фалсафаси эса битта ўйин билан ўзгариб қолмайди. Ҳатто футболчиларга ҳимоявий ўйнашни айтган тақдиримизда ҳам, биз тўққиз ойдан бери ҳужумкор футбол ўйнаяпмиз ва рақиб майдонида юқори прессинг қилишга ҳаракат қиляпмиз. Бу фалсафадан бир ўйин билан воз кечмаймиз. Қолаверса, ушбу учрашувга етарлича тайёргарлик кўришга ҳам вақтимиз бўлмади. Ўйинлар оралиғи жуда қисқа: сафардан қайтамиз, кубокда ўйнаймиз, ундан кейин эса икки кун ўтиб "Пахтакор"га қарши майдонга тушамиз. Принципларимдан қайтганим йўқ, лекин ҳимояни мустаҳкамлашга кўпроқ эътибор қаратдик. Сабаби, охирги пайтларда кўп голларни қарши ҳужумлардан ўтказиб юбораётганимизни ўзингиз ҳам кўрдингиз. "Нега биринчи даврада бундай бўлмаган?" деб сўрашингиз мумкин. Биринчи даврада жамоанинг жисмоний ҳолати анча яхши эди. Рақибнинг учинчи зонасида тўпни йўқотганимиздан кейин контрпрессингни жуда фаол амалга оширардик ва рақибнинг қарши ҳужумга чиқиб кетишига йўл қўймасдик. Иккинчи даврада эса мавсум якунига яқинлашгани сабабли футболчиларда чарчоқ аломатлари сезилмоқда. Олдинга кўтариламиз, аммо ўша ҳудудда тўпни йўқотганимизда рақибга қарши ҳужумга ўтиш имкониятини бериб қўяпмиз. Бунинг олдини олиш учун тезлик ва тезкор реакция керак. Мавсум охирига келиб, футболчиларда бу кўрсаткичлар пасайиши мумкин. Шунинг учун тўлиқ ҳимоявий тактикага ўтиб олмаймиз. Бироқ олдимизда масъулиятли ўйинлар турганини ҳисобга олиб, эҳтиёткорроқ ҳаракат қилишга мажбурмиз. Ҳали чемпионлик ҳал бўлгани йўқ. Олдинда яна бешта тур бор. Шунинг учун чемпион бўлдик, дейишга эрта. Олдимиздаги барча ўйинларда ғалаба қозониш учун ҳаракат қилишимиз керак.
- Аввало, муҳим ғалаба билан табриклайман. "Пахтакор"га қарши баҳсда чемпионлик учун жуда муҳим уч очко қўлга киритилди. Олдинда бешта тур қолди ва "Нефтчи" "Пахтакор"дан беш очко олдинда. Мухлислар бу устунликдан ташқари яна қайси омилларни ҳисобга олиб, чемпионликка ишонч билан қарашлари мумкин?
- Ҳеч ким хотиржам бўлишга ҳақли эмас. Футболчилар ҳам, биз ҳам бўшашишимиз мумкин эмас. Чемпионатнинг ўзи кутилмаган натижалар кўп бўлаётганини кўрсатмоқда. Масалан, ўз майдонимизда "Хоразм" билан ўйинда очко йўқотдик. Ҳаммаси руҳиятга боғлиқ. Футболчиларга ҳам айтганман: агар жамоа ўйинга тўғри тайёрланса, руҳан шай бўлса, бу футболчилар исталган рақибни мағлуб эта олади. Фақат баъзи вазиятларда ҳиссиётларга берилиб, бироз бўшашиб қоляпмиз. Футбол эса бундай хатоларни дарҳол жазолайди. У бундай нарсаларни кечирмайди. "Локомотив"га қарши ўйиндаги мағлубият биз учун катта сабоқ бўлди. Шу ўринда раҳбариятга ҳам миннатдорчилик билдирмоқчиман. Улар жамоани руҳий жиҳатдан жуда қийин вазиятдан олиб чиқишди ва қўллаб-қувватлашди. Худо хоҳласа, мавсум охиригача шу тарзда давом этамиз. Аммо яна бир бор таъкидлайман: чемпионлик ҳали ҳал бўлгани йўқ.
- Олдинда ҳали бешта тур бор. "Қизилқум" ва "Динамо" ҳам жиддий рақиблар, деб ўйлайман. Мени кўпроқ Осиё Чемпионлар лигаси қизиқтиряпти. Бугун турли схемаларни кўрдик: биринчи таймда 3-4-3, аммо тўп назорати асосан "Пахтакор"да бўлгани сабабли шахсан мен 5-4-1 схемасини ҳам кўрдим. Шунга қарамай, "Пахтакор"да тўрт-бешта яққол голли вазият юзага келди. Бу эса ҳимоядаги концентрация масаласи бўйича хавотир уйғотади. Беш нафар ҳимоячи билан ўйнаганимизда ҳам, Куоао ҳужумларга кўп қўшилмади, Фаррух Сайфиев прессингда унчалик муваффақиятли бўлмади. Таянч зонасида ҳам футболчиларнинг шерикларини суғурталаши ва рақиб ҳаракатларига ўз вақтида жавоб қайтариши билан боғлиқ муаммолар кўринди. Шунингдек, Зоран Марушичнинг ҳолатига ҳам изоҳ берсангиз. Уни биринчи таймда алмаштирдингиз, кейин эса кийимини алмаштирган ҳолда кўринди. Умуман, ҳимоядаги концентрация ва таркибга қўшилиши кутилaётgan икки футболчининг ҳолати ҳақида гапириб берсангиз.
- Концентрациянинг йўқолишига бир нечта омил сабаб бўлади. Биринчиси — руҳий чарчоқ, иккинчиси — жисмоний чарчоқ, учинчиси эса ўйин интизоми. Концентрация пасайганидан кейин гол ўтказиб юборишимиз ёки рақибда хавфли вазият юзага келиши мумкин. Аввало, охирги ўйинлар нега биз учун қийин кечаётганига тўхталмоқчиман. Ўтган мавсумни эсласангиз, жамоамиз охиригача учинчи ўринда бораётган эди. Футболда учинчи ўринда туриб ўйнаш билан биринчи ўринда туриб ўйнаш ўртасида катта фарқ бор. Агар жадвалда учинчи ўринда бўлсангиз, йўқотадиган нарсангиз камроқ бўлади. Олдинга интиласиз, чунки кўп нарсани йўқотиш хавфи йўқ. Биринчи ўринда бўлсангиз эса, йўқотадиган нарсангиз борлигини ҳис қиласиз. Битта хато сизни пастга тушириб юбориши мумкин. Биз мавсум бошидан бери деярли биринчи ўринда келяпмиз. Оддий мисол: "Пахтакор" ўзаро ўйинлар натижаси ҳисобига "Навбаҳор" билан учрашувдан олдин биринчи ўринга кўтарилди. Аммо Наманганда очко йўқотди. Бундай ҳолатлар ҳам руҳиятга таъсир қилади. Жамоа биринчи ўринга чиққач, уни сақлаб қолиш учун ўйнай бошлайди. Мавсум якунига яқинлашяпмиз. Биз футболчилардан кўп нарса талаб қиламиз, аммо майдонда бу талабларни бажарадиганлар — футболчиларнинг ўзлари. Ҳозир уларда биринчи ўринни йўқотиб қўйишдан қўрқиш ҳисси кучайиб бораётганини сезиш мумкин. Бу, албатта, психология билан боғлиқ. Шунинг таъсирида қарорларимиз нотўғри бўляпти, ҳимояда қўпол хатоларга йўл қўйяпмиз. Ҳар бир қарор ва пасни хато қилиб қўймаслик, бу хато голга олиб келмаслиги ҳақидаги хавотир билан амалга оширяпмиз.
Биринчи даврада марказий ҳимоячиларимиз майдон маркази орқали жуда кўп паслар беришарди. Биз улардан биринчи пас билан ҳужумчини топишни талаб қилардик ва улар буни муваффақиятли бажаришарди. Ҳозир эса беш метрлик пасларда ҳам хатога йўл қўйяпмиз. Ўша футболчилар, ўша майдон — ҳеч нарса ўзгармаган. Фақат руҳий ҳолат ўзгарган. Шунинг учун концентрация билан боғлиқ муаммоларни жамоанинг узоқ вақтдан бери биринчи ўринда келаётгани ва уни йўқотиб қўйиш хавфини ҳис қилаётгани билан изоҳлайман. Менинг тахминим шу. Зоран Марушичга келадиган бўлсак, бугун кўплаб футболчиларимизда соннинг орқа қисми мушакларида муаммолар кузатилди. Жамоамизда 30 ёшдан ошган футболчилар кўп бўлишига қарамай, улар юқори интенсивликда ўйнашга ҳаракат қилишяпти. Бугун ўйин суръати жуда юқори бўлди. Иккала жамоа ҳам ҳужум қилишга интилди, ҳар бир эпизодда футболчилар максимал тезланишга ҳаракат қилишди. GPS маълумотларини кўрганимиздан кейин спринтлар сони қанчалик кўп бўлганини билиб оламиз. Бундай юқори юклама соннинг орқа қисми мушакларида тортишишларга сабаб бўлиши мумкин. Ҳозир уларни имкони борича тезроқ тиклашимиз керак. Чунки икки кундан кейин "Ал-Иттиҳод"га қарши ўйин бор. Жокич ҳақидаги саволингизга келсак, бу ҳақда кўп интервьюларда гапирганман. Ҳатто "Манчестер Сити" ҳам Родри жароҳат олганидан кейин кўплаб ўйинларда мағлуб бўлди. Жокич ҳам жамоамиз учун жуда муҳим футболчилардан бири эди. Мавсум бошида ҳар қандай мураббий ўз ўйинини муайян футболчи атрофида қуриши мумкин. Замонавий футболда кўпинча ўйин таянч ярим ҳимоячиси атрофида қурилади. Шунинг учун Жокичнинг жароҳати ўйинимизга катта таъсир кўрсатди. Ҳозир бу вазиятдан чиқиб кетишга ҳаракат қиляпмиз. Футболда шундай ўйинчилар борки, уларнинг йўқлиги жамоага жуда катта таъсир қилади. Шунга қарамай, мавсумнинг иккинчи қисмида қолган футболчиларимиз ҳам ўзларининг юқори маҳоратини намойиш этишяпти ва жамоа учун бор кучларини беришяпти.
