"Men uchun hammasi boshidan oxirigacha yomon bo'ldi. Hech narsa o'xshamadi. Birorta ham o'yin yo'qki, biz uni yaxshi o'tkazdik yoki ko'p hujum qildik va omadimiz kelmadi deb ayta olsak. Hatto bugun ham siz Ispaniyaga o'yinni boshidan oxirigacha topshirib qo'ydingiz. Ispaniya o'yinni nazorat qildi, xohlaganini qildi, o'yin suratini boshqardi. Ular tezlashishni xohlashganda tezlashishdi, suratni sekinlashtirishni xohlashganda sekinlashishdi, biz esa shunchaki o'sha yerda hech qanday istaksiz, hech qanday zavqsiz, juda sekin harakat qildik.
Keyin esa o'zgarishlar – men ularni tushunmayman. Bu haqda gapirishdan charchadim, lekin Martines biror marta ham meni lol qoldirmadi. U sizga yoqadimi yoki yo'q, bu menga qiziq emas, xafasizmi yoki yo'q, buning ahamiyati yo'q, lekin biz ko'proq zavqni his qilishimiz kerak edi. Martines kelganidan beri men terma jamoa ijrosida birorta ham ajoyib o'yinni ko'rmadim. Bu haqiqat.
U 50 ta taktikani sinab ko'rdi, birortasi ish bermadi. Mana dalil: biz hamma "bu bizning barcha davrlardagi eng yaxshi terma jamoamiz" deb gapirgan jamoa bilan turnirdan chiqib ketmoqdamiz. Lekin nimasi bilan eng yaxshi? Ular nimani yutishdi? Biz uyga xafa bo'lib, boshimiz egilgan holda qaytamizmi? Eng yaxshisi, ushbu jahon chempionati haqida gapirishni to'xtatganim maqul, aks holda keyinchalik afsuslanishim mumkin bo'lgan gaplarni aytib qo'yaman", – dedi Kuarejma.
Roberto Martines Portugaliya terma jamoasini 2023-yilda qabul qilib olgan va u bilan 2024/25-yilgi Millatlar ligasida g'olib chiqqan edi.
