- Муҳими уч очкога эга бўлдик. Мухлисларбоп ўйин бўлди. Бундан олдинги учрашувларда ҳам мухлисларга ёқадиган ўйинлар кўрсатаётгандик, фақатгина гол уриш бобида оқсаётгандик. Бугун Ҳудога шукур, 5-6 имкониятнинг биттасидан фойдаландик. Бизга панд бераётган нарса фақатгина шу эди: тепаётган тўпларимиз дарвозадан ўрин олмаётганди. Иккинчи бўлимда Азиз Холмуродовнинг ўзида 3та юз фоизлик имконият бўлди. Шунингдек, Нодир Абдураззоқов ва Асадбек Собиржоновларда ҳам яхши вазиятлар бўлганди. Бундай имкониятларда рақибларни кечириш керак эмас. Бу борада ишлаяпмиз, йигитларга барчасини тушунтиряпмиз. Буёғига йигитлар ўзларига ҳулоса чиқариб, кейинги ўйинларда кўпроқ голлар кўрамиз, деган умиддаман. "Хоразм"га кейинги ўйинларда омад тилайман.
- Сўнгги 3 ўйинда жамоа умуман гол ура олмади, лекин кўплаб вазиятлар яратилди. Бу жамоанинг руҳиятига қандайдир таъсир ўтказмайдими?
- Фақатгина 3та эмас. "Насаф" билан ўйинда Абдувоҳид Неъматов бир қанча вазиятларда жамоасини яққол голлардан қутқарди. Ҳақиқатдан ҳам бизда кўплаб яхши имкониятлар бўлмоқда. Агарда бу руҳан таъсир қилганида жамоа бунча вазиятлар ярата олмасди. Нафақат бизда, балки, бутун дунёда ҳам жамоалар шундай қийин ҳолатларга тушиб қолишини, яхши вазиятлардан фойдалана олмаслигини кўрганмиз. Биз барча кўрсатмаларни беришда давом этяпмиз. Барчаси футболчининг ўзига қолган. Бу ҳолат нафақат менга, балки, футболчиларга ҳам тажриба бўлади. Улар бундан тўғри ҳулоса чиқаришади деган умиддаман. Бу кўпчиликнинг меҳнати. Агар ҳужумда шундай вазиятлардан голлар ура олишмаса, қарши ҳужумларда голлар ўтказиб юбориш ҳам ҳеч нарса эмас. Кейинги ўйинларда ҳужумчилар бундай вазиятлардан фойдалана олишади деган умиддаман ва ният қилиб қоламан.
