- Ўйин ҳақида фикрингиз?
- Биринчи навбатда мухлисларимизни табриклайман. Ишқибозларимиз стадионда жуда чиройли муҳит ҳосил қилишди, биз худди уйда ўйнагандек бўлдик. Шу боис мухлисларга алоҳида миннатдорчилик билдираман. Ўйинга келадиган бўлсак, баҳс оғир кечиши аниқ эди. Водий дербиси ўз номи билан ҳар икки жамоа ҳужумкор ўйин намойиш этди. Ўйлайманки, чиройли ўйин кўрсатиб ғалаба қозондик. Лобановскийнинг гапини эшитгансиз: ўйин унутилади, натижа қолади.
Учрашувдан олдин берилган кўрсатмаларда кўпроқ ўйин интизомига эътибор қаратдик. Биринчи таймда ташаббус "Андижон" томонида бўлди ва биз бунга тайёр эдик, чунки шунга мос режа ишлаб чиққандик. Иккинчи бўлимга келиб ўз ўйинимизни кўрсатишни бошладик ва темпни ошириб бордик. Шу орқали рақибни хато қилишга мажбур қилдик.
Умуман ўйинни оладиган бўлсак, ҳужумни бошлашда ҳимоядан пас билан чиқиб кетишга ҳаракат қилдик. Майдон ҳолатидан келиб чиқиб ўз дарвозамиз олдида узун паслар ташкил этдик, рақиб жарима майдончаси яқинида эса қисқа паслар билан ўйнадик. Бу ўйин услубини тўлиқ ўрганиб олмаганимиз боис иккинчи тўпларда ютқазиб қўйдик. Шундан кейин иккинчи бўлимда ўз услубимизга қайтиб прессинг уюштира бошладик. Рақиб бизга яхши қаршилик қилди, жамоада яхши мураббий ишлаяпти. Ўйлайманки, бу мураббий билан "Андижон" ҳали кўп ғалабага эришади.
- Рақиб сафида Усмонали Исмоналиевнинг қаизил карточка олиши ўйинга таъсир қилди деб ўйлайсизми?
- Энди бу футбол. Ҳар нарса бўлиши мумкин. Рақиб 11 киши бўлиб ҳаракат қилганида ҳам, биз гол уришимиз мумкин эди. Ўша ҳолатгача бўлган вазиятни оладиган бўлсак, иккинчи таймни ҳужумкор бошладик ва рақибни хато қилишга мажбур қилдик. Кетма-кет ҳужумлар ва юқори прессинг эвазига рақиб қўпол ўйнашга мажбур бўлди. Мен рўй берган ҳолатга яқин тургандим, футболчи атайин қилмагандир, лекин қоида ҳамма учун бир хил. Балки бу ҳам таъсир қилган бўлиши мумкин. Аммо бизнинг ҳам ўйинни кучайтириш борасида ўз режамиз бор эди.
- Кўплаб беллашувларда ҳимояда ҳаракат қилган Убайдуллаев бугун ярим ҳимояда ўйнади. Бу тактика билан боғлиқми?
- Бу кўпроқ жароҳатлар билан боғлиқ. Жамоамизда жароҳатлар кўпайиб кетди. Асосий таянч ярим ҳимоячимиз Йован Жойкич жароҳат сабаб сафдан чиқди. Аброр Исмоилов, Анвар Ғофуровларда ҳам жароҳат бор. Бугун мана Ратиньо ҳам жароҳат олди. Бу ҳолатда кейинги учрашувларга қандай ҳозирлик кўрамиз билмайман. Етакчилар бирма-бир сафдан чиқяпти. Икром Алибоев нима учун захирада қолдирилди? Чунки унда учта сариқ карточка бор эди. "Бухоро" билан баҳсни инобатга олган ҳолда уни захирада қолдиргандик. Афсус, бугун у тўртинчи "сариғи"ни олди, энди кейинги тур ўйнай олмайди. Муҳсин учун ярим ҳимоя янгилик эмас, ўтган тур "Қизилқум" билан баҳснинг охирги 20 дақиқасида "Андижон"га қарши тайёргарликни бошлагандик ва Муҳсинни ярим ҳимояда ўйнатгандик.
- 18 ёшли Нурмуҳаммад Абдуғаниевнинг ўйини борасида фикрингиз?
- Албатта, "Нефтчи"дек чемпион жамоада ёшларнинг ҳаракат қилиши кўзни қувонтиради. Бу футболчининг ўзи учун ҳам катта ютуқ. Мураббий сифатида биз ҳам катта таваккалга қўл уряпмиз. Нурмуҳаммад ишончимизни оқлаб келмоқда. Агар ишлашдан тўхтамаса, пайти келиб у ҳам Абдуқодир Ҳусанов даражасига чиқади. 18 ёшида Суперлигада яхши ҳаракат қиляпти, шу пайтгача 3-4та ўйинимизда майдонга тушиб ҳали бирорта хато қилмади. Бу ёш футболчи учун катта ютуқ ҳисобланади.
- Ёзги трансфер ойнасида "Андижон" "Нефтчи"нинг икки футболчисига алоқага чиқди: Жумаев билан Пўлатовга. Ёшларда ўйин тажрибасини ошириш учун "Андижон"га берган маъқул эмасмиди?
- Иззатилло Пўлатовни бермоқчи бўлдик, лекин "Андижон" хоҳламади. Асилбек Жумаевга келсак, Аброр Исмоилов жароҳат олгач унинг чизиғида битта ўйинчини ушлаб туришимиз керак эди, шу боис Жумаевни қўйиб юбормадик.
- Айтиб ўтганингиздек, бугун Ратиньо жароҳат олди. Дарвозабон Ботирали Эргашев ҳам жароҳат олишига оз қолди. Элит ОЧЛда бу каби йўқотишлар билан қандай иштирок этмоқчисиз?
- Ҳозир бир нарса дейиш қийин, бу борада мумарббийлар ўтириб яна маслаҳат қиламиз. Биз учун ҳар бир беллашув оғир ўтяпти ва ҳар ўйинда жароҳат кузатиладиган бўлса, унда қийналиб қолишимиз мумкин ва бу ўринда ёшларга кўпроқ имкон берамиз. Вазиятдан чиқиб кетишга ҳракат қиляпмиз. Рестартдан сўнг осон ўйин ўтказмадик, ҳар бир баҳс қийин кечяпти. Тўғри, энг муҳим футболчиларимизни йўқотяпмиз, лекин бу вақтинча ҳолат деб умид қиламан. Насиб қилса Элит ОЧЛгача футболчиларимиз тикланиб сафга қайтишади.
