- Авваламбор барча мухлисларимизни ғалаба билан табриклайман. "ФарДУ" ҳам яхши жамоа, Пролигада яхши ўйинлар кўрсатяпти, уларни кўриб чиққандик. Бугун ҳам улар яхши ҳаракат қилишди. Ўз навбатида биз ҳам чиройли ўйин кўрсатдик, кўплаб вазиятларга эга бўлдик. Энг асосийси - ғалаба қозондик ва кейинги босқичга чиқдик.
- "ФарДУ" жамоаси ҳақида фикрингиз қандай?
- Яхши жамоа. Бу ўйингача бўлган бир неча учрашувларини кўриб чиқдик. Ундан ташқари ушбу жамоани Фарғона жамоаси бўлгани учун ҳам кузатардик. Мураббийи ҳам яхши, чиройли ўйин қуряпти. Ўйинда мантиқ бор. Ҳар бир футболчининг нималарга қодирлигини, нималар қилаётганига қараб, иш тутмоқда. Муҳими - жамоанинг ўйини бор. Натижани бир чеккага сурадиган бўлсак, мураббий ҳам жамоа ҳам яхши.
- "Навбаҳор" Суперлигадан кўра, Ўзбекистон Кубоги учун кўпроқ куч бера оладими?
- Ҳар бир жамоада мақсад бор. Биз ҳам барча мусобақаларда ғолиблик учун курашяпмиз. Кубокда ҳам чемпионатда ҳам охиригача ҳаракат қиламиз.
- Муҳаммадали Ғиёсов ҳамда Ҳусайн Норчаев жароҳатдан қайтиши биланоқ голлар уришди. Уларга иккинчи даврада жамоада имконият бериладими?
- Биринчи даврадаёқ уларнинг йўқлиги билинди деб ўйлайман. Улар жамоага янада кўпроқ куч бағишларди ва кучлироқ бўларди, айниқса, ҳужумда. Чунки улар яхши даражадаги футболчилар. Шунингдек, Забиҳилло Ўринбоев ҳам бор. Айрим ўйинларда бизда ресурслар етмади. Шу сабабли уларни кутяпмиз. Омон бўлишсин, жароҳат олишсин. Барча футболчи жамоага куч беради.
- Катулонди Кати жамоадан кетадими ёки мавсум охиригача қоладими?
- У билан музокаралар олиб боряпмиз. Ўзи бунгача ўзаро келишув ҳам бор эди, ёзда ўйлаб кўришимизни айтгандик. Чунки у 5-6 ой футбол ўйнамасдан жамоага келганди, қишки йиғинларга ҳам кеч қўшилганди. Қайсидир ўйинларда унинг жамоага фойдаси тегди, қайсидирларида ўйини чиқмади. Агар бизга ёқадиган бўлса, жамоада олиб қоламиз, акс ҳолда кетказиб юбориш эҳтимолимиз ҳам бор. Бу борада раҳбарият билан гаплашамиз.
- ЖЧ сабабли кичик танаффус юзага келади. "Навбаҳор"нинг тайёргарлик режалари қандай?
- Илк навбатда терма жамоага омад тилаймиз. Ҳар биримиз Ватан жамоасига мухлислик қиламиз. Ёруғ юз билан кетиб, ғалабалар қозониб, ёруғ юз билан қайтишларига ишонаман. Биз ҳам бу пайтда тайёргарлик кўрамиз, унгача кичик таътилга чиқамиз. Кейин эса биринчи давранинг сўнгги 4 ўйини ва иккинчи давра учун тайёргарликни давом эттирамиз.
