“Сўғдиёна” кеча ўзгача машғулот ўтказди

Кеча“Сўғдиёна” стадионида “Сўғдиёна” футболчилари жисмоний ҳолатларини қай даражада эканлигини аниқлаш мақсадида Финляндияда ишлаб чиқарилган “Полар” қўрилмаси ёрдамида синов-машғулотларни ўтказишди.

Ушбу қўрилма машғулотлар давомида футболчиларнинг юрак уришини кузатиб бориш учун қўлланилади. Бу махсус аппарат Ўзбекистонда бир неча йиллар давомида қўлланилиб келинади. Афсуски, ҳамма жамоалар ҳам ундан  фойдаланмайди. Бу аппаратнинг хусусиятлари шундаки, у мураббийга машғулот пайтида футболчи қандай пульсда ўйнаётгани ҳақида аниқ маълумот беради. Машғулотлардан сўнг ёрдамчи мураббий махсус аппаратдан маълумотларни ўз компютерига юклаб олади ва шу тариқа футболчи қандай юкламада ҳаракат қилганини билиб олади. Натижага қараб Кейинги машғулотда у футболчига индивидуал машғулот режалаштиради.

Қисқача қилиб айтганда бу аппарат мураббийга машғулотларнинг интенсивлигини ҳамда кейинги машғулотларни қай тартибда режалаштириш мумкин эканлиги ҳақида маълумот тўплашга ёрдам беради. Бу эса футболчиларнинг доимо оптимал ҳолатда бўлишларини таъминлаши мумкин. “Баъзи мураббийлар бу каби машғулотларни олиб боришмайди ва кўпинча улар ўз ички ҳиссиётларига таянишади. Бу эса уларга панд бериши мумкин. Бу каби даччиклардан мураббийлар фойдаланишса ўйинга футболчиларни тўғри тартибда оптимал формага олиб келиш ва машғулотларни тўғри режалаштириш имконини беради”-дейди ЎФА  илмий-услубий бошқарма бошлиғи  Шамил Исаев. Маълумот ўрнида айтиш жоизки, ушбу синов машғулотларни ЎФА илмий-услубий бошқарма мутахассислари кузатиб боришди ва ўз тавсияларини бердилар.