39 ёшли Месси 6 октябрь куни Буэнос-Айресдаги "Монументаль Антонио Веспусио Либерти" стадионида Бенинга қарши баҳсда Аргентина терма жамоаси сафида сўнгги марта майдонга тушади. У аввалроқ халқаро фаолиятини якунлашини маълум қилган эди.
"Менимча, у бунга лойиқ. Мен бу ишга оз бўлса-да ҳисса қўшганимдан хурсандман. Унинг хайрлашув маросимида бўлишни хоҳлайман. Ўзим ҳам кейин ишлашда давом этаманми-йўқми, билмайман. Шунинг учун у ушбу ўйинда майдонга тушиши учун ҳаракат қилдик", — деди Скалони.
Мутахассис Мессининг мухлислар билан хайрлашиш истагини алоҳида таъкидлади:
"Биз унинг бошидан кечираётган барча нарсаларни билардик. Шунга қарамай, у келиб, ўз халқи — уни шунчалик яхши кўрадиган инсонлар билан хайрлашиш учун хоҳиш ва куч топди.
Агар хайрлашув маросимини ўтказиш керак бўлса, буни ҳозир қилиш лозим. Чунки у ҳеч қачон тўхтамаса ҳам, кейин бу сеҳр аввалгидек бўлмаслиги мумкин. Ҳозир эса у мухлислар меҳрини ҳис қилиши мумкин бўлган энг яхши пайт", — дея қўшимча қилди Аргентина бош мураббийи.
Скалони Месси билан шахсан суҳбатлашганини ҳам айтди: "Мен у билан гаплашдим ва буни айнан ҳозир қилиш кераклигига ишонтиришга ҳаракат қилдим. Кейин нима бўлишини ҳеч ким билмайди. У мени тушунди. AFA ва президент ҳам бу ташаббусни қўллаб-қувватлади. Бу жуда чиройли ҳолат ва у бунга лойиқ. Буни қанчалик эрта қилсак, шунчалик яхши".
Эслатиб ўтамиз, айни шу сабабли Аргентинанинг Осиёдаги турнеси, ҳусусан, Ўзбекистон термасига қарши ўйини ҳам бекор қилинди.
