Шукурали Пўлатов: “Жамоамизда ғалабага бўлган ишонч юқори”

Баҳсдан аввал “Нефтчи” футболчиси Шукурали Пўлатов ўз фикрлари билан ўртоқлашди. Марказий ҳимоячи навбатдаги дерби олдидан муносабат билдирар экан, “Нефтчи” жамоасига ғалаба сув ва ҳаводек зарур эканлигини айтиб ўтди.

- Ўтган йили ўз майдонимизда кутилмаганда Қўқон жамоасига мағлуб бўлгандик. Очиғи, ўша баҳсда омадимиз келмаганди. Қўқонликларни ҳурмат қиламиз. Сергей Ковшов қўл остида ажойиб жамоа шаклланган. Бироқ биз дербида фақат ғалаба учун майдонга чиқамиз. Жамоамиз “Қўқон-1912”га қарши ўйинга жиддий тайёргарлик кўрди. Айниқса “Пахтакор” устидан қозонилган ғалабадан сўнг йигитларни ўзига бўлган ишончи ортди. Бу эса жуда муҳимдир. Сўнгги баҳсларда ишқибозлар ташрифининг кескин пасайиб кетишига гувоҳи бўляпмиз. Ўтган турдаги муваффақиятдан сўнг яна мухлисларимиз стадионга қайтишади деб умид қиламан ва жамоа вакили сифатида эса барча фарғоналикларни “Истиқлол” стадионига чорлайман, - деди Пўлатов.

“Мураббийимиз Мурод Исмоиловни жамоамизга қайтгани фақат  фойдамизга ишлади деб ҳисоблайман. Мурод Музаффарович бош мураббийимиз Андрей Фёдоров билан бир-бирларини жуда яхши тушуниб ишлашади ва жамоани ўйинларга жиддий хозирлашади, - деб қўшимча қилди 26 ёшли футболчи.

Эслатиб ўтамиз, “Нефтчи” – “Қўқон-1912” ўйини бугун “Истиқлол” стадионида бўлиб ўтади.   

“Нефтчи” матбуот хизмати