Шавкат Саидов: "Андижонликлар биз кутганданда кучли футбол намойиш этишди"

 - Сўнгги турларда кетма кет ютқазган “Андижон”нинг Бекободга ижобий натижа илинжида келишини билардик. Шунга яраша йигитларни ҳам жисмонан, ҳам руҳан ўйинга тайёрладик. Андижонликлар эса биз кутганданда кучли футбол намойиш этишди. Биринчи бўлимда жамоаларга чиройли ўйин кўрсатишлари учун об-ҳавонинг ниҳоятда исиб кетиши бироз халақит берди деб ўйлайман. Бироқ иккала жамоа ҳам табиий қийинчиликка қарамасдан фаоллик кўрсатди. Киритилган голлар шу меҳнатларнинг маҳсули бўлди. Иккинчи тайм биринчисидан очиқ футбол намойиши билан фарқ қилди. Тўғриси омадимиз чопди. Агар тажрибали Анвар Бердиев иккита имкониятдан биттасидан фойдаланганида ҳам вазият тамомила бошқа тарафга ўзгариб кетарди. Дарвозабонимиз жамоа жонига оро кирди. Бундан руҳланган йигитлар эса ташаббусни ўз қўлларига олишди ва мухлисларимизни навбатдаги ғалаба билан хушнуд этишди. Бунинг учун йигитларга катта миннатдорчилик билдирамиз, - дейди Шавкат Неъматжонович.

"Металлург" матбуот хизмати