Мадриднинг "Реал" клуби футболчилари Хаби Алонсонинг истеъфосини кутишмаган эди. Аввалроқ бош мураббийнинг икки томонлама келишувга кўра клубни тарк этгани маълум бўлганди. Бу воқеа "қаймоқранглилар" Испания Суперкубоги финалида "Барселона"га (2:3) имкониятни бой берганидан сўнг юз берди.
Marca нашрининг хабарига кўра, айрим футболчилар мураббий кетганини клубнинг расмий баёноти орқали билишган. Кийиниш хонасида ҳеч ким мавсумнинг бу палласида бундай кескин қарор қабул қилинишини кутмаганди. Айниқса, финалдан кейинги ва уйга қайтиш вақтидаги самолётдаги вазмин муҳит бундан далолат бермаган.
Суперкубокдан сўнг ўйинчилар мураббий ўз лавозимида қолишига ишонишган эди. Улар хавотир учун сабаб кўришмаган, чунки "Барса"га минимал ҳисобда ютқазилганди. Аксинча, жамоа лойиҳа давом этаётганига ишонган, тақдирлаш маросимида президент Флорентино Переснинг Алонсо билан қучоқлашиб кўришгани эса мураббий тўлиқ қўллаб-қувватланаётгани сифатида қабул қилинганди.
Шу сабабли, Хабининг кетиши жамоа учун ҳақиқий "шок" бўлди. Бир неча футболчилар шахсий суҳбатда бу хабарни олдиндан огоҳлантиришсиз, фақат расмий баёнотдан билишганини тан олишган. Шунингдек, ўйинчиларнинг таъкидлашича, охирги ҳафталарда мураббий ва жамоа ўртасидаги муносабатлар янада яхшиланган эди.
