24 ёшли англиялик футболчи лондонликлар билан келишувини яна бир йилга — 2034 йил ёзига қадар узайтирди.
"The Athletic" маълумотига кўра, янги шартнома футболчининг жамоадаги ўрнини инобатга олган ҳолда яхшиланган молиявий шартларни ҳам ўз ичига олади. Палмернинг аввалги шартномаси 2033 йилгача амал қиларди.
Аввалроқ футболчининг клубни тарк этиши мумкинлиги ҳақида турли хабарлар тарқалганди. Бироқ Палмер апрель ойида "Челси"дан кетишни режалаштирмаётганини билдирган.
Палмер 2023 йилда "Манчестер Сити"дан "Челси"га ўтган. Шундан бери у жамоа сафида 138 та учрашувда майдонга тушиб, 58 та гол урган ва 34 та голли узатмани амалга оширган.
2025 йилда англиялик футболчи "Челси" билан Конференциялар лигаси ва клублар ўртасидаги Жаҳон чемпионатида ғолиб чиққан. У Жаҳон чемпионати финалида ПСЖга қарши баҳсда дубль қайд этган.
Палмер жорий мавсумда барча турнирларда 7 та учрашув ўтказиб, 4 та гол ва 2 та голли узатма муаллифи бўлди.
