Сўнгги тўртта Жаҳон чемпионати ғолибидан учтасини тўғри топган ва ўзини экстрасенс деб эълон қилган шахс шу ёзда АҚШ, Мексика ва Канадада бўлиб ўтадиган мусобақа учун ўз тахминини маълум қилди.
Бразилиялик Майкл Бруно мундиал ғолибларини башорат қилиш борасида яхшигина тажрибага эга.
Жанубий Африкадаги 2010 йилги турнир олдидан у Испания машҳур кубокни биринчи марта кўтаришини таъкидлаган эди – Андрес Иньеста қўшимча бўлимларнинг сўнгги дақиқаларида Нидерландия дарвозасига ғалаба тўпини киритганидан сўнг, улар айнан шу ишни қилишди.
Кейинчалик Бруно 2014 йилда ўз ватанида Германиянинг муваффақият қозонишини башорат қилди, орадан тўрт йил ўтиб эса Франциянинг Хорватия устидан қозонадиган ғалабасини ҳам аниқ топди.
Бироқ Қатардаги 2022 йилги мусобақада у Франция ўз чемпионлигини ҳимоя қилади деб ўйлаган эди. Дидье Дешам шогирдлари финалга қадар етиб борди, бироқ Аргентинага қарши пенальтилар сериясида мағлубиятга учради.
Шунга қарамай, Бруно шу ёздаги турнир учун яна бир башорат билан қайтди.
"Globo Esporte" нашрига берган интервьюсида у шундай деди: "Мен 2022 йилдан бери навбатдаги чемпион жамоани эълон қилиб келяпман. Ўшандан бери Португалия жаҳон чемпиони бўлишини таъкидлаб келмоқдаман".
Худди шундай. Асосий даъвогарлар сифатида Франция, Испания, Англия, Аргентина, Португалия ва Бразилияни санаб ўтгач, Бруно Криштиану Роналду ва Португалия 19 июль куни ўз тарихидаги илк Жаҳон чемпионати кубогини қўлга киритишига ишонмоқда.
Юқоридагилардан ташқари, Бруно амалдаги чемпион Аргентина чорак финал босқичидаёқ мусобақани тарк этишига ва Неймарнинг жисмоний ҳолати сабабли Бразилия ҳам эрта чиқиб кетишига ишонмоқда.
"Неймар бу турнирда ўйнашга 100 фоиз тайёр деб ўйламайман. Агар у ўйнаса, терма жамоа яна бир бор ярим финалгача мусобақани тарк этади, чунки бутун жамоа унинг атрофида ўралашиб, 2022 йилги тактик хатони такрорлайди", – деди у.
