Бироқ "Погонь" ва "Пяст" клубларининг собиқ футболчиси Ўзбекистон жамоасида узоқ вақт ушланиб қолмади – бир неча ойдан сўнг томонлар ўртасидаги ҳамкорлик муддатидан олдин якунига етди.
Бор-йўғи 13 та ўйинда майдонга тушиб, иккита гол урган Пажишекнинг "Пахтакор" билан шартномаси ўзаро келишувга кўра бекор қилинди. Натижада польшалик футболчи эркин агент мақомида трансфер бозорига чиқди.
Пажишекнинг келажагига тезда ойдинлик киритилди. Маълум бўлишича, 32 ёшли футболчи ўзига яхши таниш бўлган Финляндияга қайтишга қарор қилди ва яна "КуПС" билан шартнома имзолади. Томонлар 2027 йилнинг 30 июнига қадар амал қиладиган битимга имзо чекишди.
"Ўзимни жуда яхши ҳис қиляпман. Қайтганимдан бениҳоя хурсандман. Ўзбекистондаги шартномамни бекор қилганимда, 'КуПС'га қайтишим мен учун аниқ эди. Воқеалар жуда тез ривожланди ва бу мен учун энг мантиқий ечим бўлди", – дея фикр билдирди полшалик ўйинчи.
"Менда бошқа вариантлар ҳам бор эди, Финляндиянинг бошқа бир клуби ҳам қизиқиш билдирди. Аммо 'КуПС' энг мантиқий танлов эди ва мен қарор қабул қилишни кечиктиришни хоҳламадим. Кубок финалидаги омадсизликни ҳисобга олмаганда, олдинги даврдан фақат ижобий хотиралар қолган. Клубдаги ва мухлислар орасидаги муҳит шунчаки фантастик эди", – дея қўшимча қилди у.
Пажишек ўтган мавсумнинг биринчи ярмида Финляндия юқори дивизиони вакили сафида 24 та ўйинда майдонга тушиб, 11 та гол ва 2 та голли узатмага муаллифлик қилган эди.
Куопиоликлар кейинги Чемпионлар Лигаси саралаш босқичида иштирок этишади. Биринчи босқичда уларни Шимолий Македониянинг "Вардар Скопье" жамоасига қарши иккита ўйин кутиб турибди.
