Иорданиядаги учрашув трансляцияси бошланиши билан томошабинлар хира тасвир, тез-тез узилишлар ва ҳисобни кўрсатишдаги хатоликларга гувоҳ бўлишди. Кейинроқ эса сигналнинг ўта ёмонлиги сабабли телеканаллар ўйин намойишини бутунлай тўхтатишга мажбур эди. Бу ҳолат ижтимоий тармоқларда мухлисларнинг кескин танқидлар тўлқинини келтириб чиқарди.
Иордания телевидениеси ўйинни ўз техник имкониятлари ва кўчма телевизион станциялари ёрдамида бепул трансляция қилишни таклиф қилганини, бироқ Иордания футбол ассоциацияси буни рад этиб, хусусий компанияни танлаганини ва юз берган ҳолат учун масъулият Ассоциация зиммасида эканини маълум қилди.
Ўз навбатида, Иордания футбол ассоциацияси мухлислардан узр сўраб, баёнот берди. Қайд этилишича, маҳаллий телеканаллар трансляция ҳуқуқи бўйича таклифга кеч жавоб бергани сабабли улар хусусий компания хизматидан фойдаланишга мажбур бўлган. Эфирдаги узилишлар эса сигнал узатишда ишлатилган интернет хизматининг сифатсизлиги билан изоҳланган.
Ҳозирда икки хил баёнот ўртасида қолган жамоатчилик хусусий компания билан тузилган шартнома тафсилотларини ошкор қилишни, трансляция барбод бўлгани учун айбдорларни жавобгарликка тортишни ҳамда келгуси ўйинларда бундай ҳолат такрорланмаслиги учун чоралар кўришни талаб қилмоқда.
Эслатиб ўтамиз, Сурия терма жамоаси 1 октябрь куни Тошкентдаги “Пахтакор” стадионида Ўзбекистон миллий терма жамоасига қарши навбатдаги ўртоқлик ўйинини ўтказади.
