Футболчи шу сабабли "Фулад"га қарши учрашувни ўтказиб юборди.
“Varzesh3” нашрининг хабар беришича, Ўрунов жорий мавсумда илк бор жароҳат билан боғлиқ муаммога дуч келди. Ўзбекистонлик футболчи "Мес Шаҳрибобак"ка қарши учрашувда асосий таркибда майдонга тушган, бироқ танаффусда алмаштирилган эди.
Ўша ўйиндан кейин "Персеполис" мураббийлар штаби Ўруновнинг алмаштирилишига мушаклардаги оғриқ сабаб бўлганини, футболчининг саломатлиги билан таваккал қилмаслик учун шундай қарор қабул қилинганини маълум қилганди. Бироқ у кейинги уч кун давомида жамоа машғулотларида иштирок этмади ва "Фулад"га қарши баҳсни ҳам ўтказиб юборди.
Нашрнинг таъкидлашича, Ўрунов сўнгги икки ярим мавсум давомида жароҳатлар сабабли бир қатор учрашувларни ўтказиб юборган. Бу даврда футболчи етти марта жароҳат олган.
Ҳозирча 25 ёшли футболчининг қачон сафга қайтиши номаълум. Шунингдек, у ноябрь ойидаги ФИФА кунлари олдидан "Персеполис"нинг қолган икки учрашувида иштирок эта оладими ёки йўқми, аниқлик киритилмаган.
