Бу ҳақда у ижтимоий тармоқлардаги саҳифасида ёзиб қолдирди.
"Манчестер Юнайтед"нинг 39 ёшли собиқ футболчиси илиқ қабул ва биргаликда босиб ўтилган йўл учун клубга, шаҳар аҳлига ҳамда бутун Қозоғистонга миннатдорлик билдирди.
Мавсумнинг сўнгги баҳсида "Актобе" Қўстанайга сафар уюштириб, "Тобол" меҳмони бўлади.
"Бу Актобедаги охирги уй ўйиним бўлди. Саргузаштимиз ўз якунига етмоқда, аммо қандай ажойиб йўлни биргаликда босиб ўтдик! Ушбу ажойиб клубдаги барчага, мазкур шаҳарнинг гўзал инсонларига ва бутун Қозоғистонга биргаликда бошдан кечирганларимиз ҳамда мени шунчалик самимий қарши олганингиз учун раҳмат. Олдинда чемпионат доирасидаги яна бир ўйин бор, лекин ҳозирданоқ фаолиятимнинг ушбу босқичидаги илиқ хотиралар қалбимда абадий қолишини айта оламан", – деб ёзди Нани.
Эслатиб ўтамиз, португалиялик вингер "Актобе" сафига 2026 йилнинг январь ойида келиб қўшилганди. Унинг шартномаси мавсум охиригача мўлжалланган.
Футболчи чемпионат доирасидаги 23 та ўйинда майдонга тушиб, 1 та гол урди ва 4 та голли узатмани амалга оширди. Қозоғистон Кубогида эса Луиш 2 та ўйинда иштирок этиб, 2 та тўп киритди.
Нани "Манчестер Юнайтед" сафидаги ўйинлари орқали машҳурликка эришган бўлиб, у ерда Чемпионлар Лигасида зафар қучган ва тўрт карра Англия чемпионига айланган. Шунингдек, у Португалия терма жамоаси сафида 2016 йилги Европа чемпиони ҳисобланади.
