Тарихдаги энг буюк футболчилардан иккитаси шу пайтгача ЖЧ баҳсларида ҳеч қачон ўзаро тўқнаш келишмаган. Ваҳоланки, уларнинг ортида бештадан жаҳон чемпионати (2006, 2010, 2014, 2018 ва 2022) турибди. Аммо бўлажак мусобақада бизда Аргентина ва Португалия ўртасидаги афсонавий жангни кўриш учун ажойиб имконият мавжуд! Роналду ва Месси тўқнашувини қайси ҳолатларда ва қачон кутишимиз мумкинлиги ҳақида сўз юритамиз.
"ЖЧ-2026'ни Allplay'да томоша қилинг — CHAMPIONATASIA промокоди билан 45 кун бепул". Промокодни фаоллаштириш ҲАВОЛАСИ
Биринчи сценарий — чорак финал
Энг кўп кутилаётган ва энг мантиқий сюжет. Бунинг учун Аргентина ва Португалия терма жамоалари ўз гуруҳларида биринчи ўринни эгаллашлари керак. Эслатиб ўтамиз, амалдаги чемпионлар (Аргентина) гуруҳда Австрия, Жазоир ва Иордания билан ўйнайди. Португалияни эса Ўзбекистон, Колумбия ва ДР Конгога қарши баҳслар кутмоқда. Шундай экан, ҳар икки терма жамоанинг гуруҳда биринчи бўлиш эҳтимоли юқори.
Кейинги босқичда — Месси ва Роналду ўз жамоаларини 1/16 ва 1/8 финалдан олиб ўтишлари лозим. Ҳозирча ушбу босқичларда Аргентина ва Португалияга ким рақиблик қилишини аниқ айтиб бўлмайди (чунки ҳамма нарса учинчи ўринни эгаллаган 12 та жамоадан энг яхши 8 таси саралаб олинганидан кейин маълум бўлади). Аммо бу терма жамоаларнинг мақсади ва таркиб даражасига қарасак, улар ушбу босқичга етиб боришга мажбур. Шунингдек, жамоалардан бири гуруҳда иккинчи, наригиси эса учинчи ўринни эгалласа ҳам ушбу босқичда тўқнаш келиб қолишлари мумкин (бу учинчи ўриндаги кучли 8 талик рўйхатига боғлиқ).
Иккинчи сценарий — финал
Португалия — Аргентина ўртасидаги финал қанчалик тарихий ва ҳаяжонли бўлишини тасаввур қилиш ҳам қийин. Бундай сюжет қаршисида ҳатто энг машҳур кинорежиссёрлар ҳам лол қолиши аниқ. Opta суперкомпьютери маълумотларига кўра, португалияликларнинг финалга чиқиш имконияти — 14,4%, аргентиналикларники эса — 17,15% ни ташкил этмоқда. Бу умумий рўйхатда бешинчи ва тўртинчи кўрсаткич демакдир, яъни имкониятлар ёмон эмас.
Месси ва Роналду финалда тўқнаш келишлари учун жамоалардан бири ўз гуруҳида биринчи, иккинчиси эса иккинчи ўринни эгаллаши керак. Шунда Аргентина ва Португалия плей-офф сеткасининг икки хил томонига тушиб қолади ва 1/16, 1/8 финал, чорак финал ҳамда ярим финал орқали бир-бирлари томон ҳаракат қилади. Агар ҳар икки терма жамоа ўз гуруҳларида учинчи ўринни банд этиб, энг яхши 8 та жамоа қаторига кирса ҳам финалда ўзаро ўйнашлари мумкин. Аммо бу вариант жуда ҳам фантастик кўринишга эга.
Учинчи сценарий — 1/8 финал
Чорак финалдаги тўқнашувга қараганда бироз камроқ кутилаётган, аммо реал вариант. Роналду ва Месси жангини 1/8 финалда кўриш учун уларнинг терма жамоалари гуруҳда иккинчи ўринни эгаллашлари ва плей-оффнинг илк босқичидан (1/16 финалдан) муваффақиятли ўтишлари кифоя.
Муқобил вариантлар ҳам бор
Эслатиб ўтамиз, 1/16 финалга 12 та гуруҳдан энг яхши иккитадан жамоа ва учинчи ўринни эгаллаган энг яхши 8 та терма жамоа йўл олади. Жами — 32 та жамоа. Агар Аргентина/Португалия жуфтлигидан бири ўша кучли саккизта учинчи ўрин эгалари қаторидан жой олса, иккинчиси эса ўз гуруҳида биринчи бўлса, унда плей-оффнинг илк босқичидаёқ ўзаро ўйин гувоҳига айланишимиз мумкин. Бироқ бу ерда ҳамма нарса ФИФАнинг комбинациялар жадвалига боғлиқ бўлади. Бундай вариантни 100 фоиз кафолатлаб бўлмайди.
"ЖЧ-2026'ни Allplay'да томоша қилинг — CHAMPIONATASIA промокоди билан 45 кун бепул". Промокодни фаоллаштириш ҲАВОЛАСИ
