Мората стюард билан тўқнашиб кетиб жароҳат олди ва Евро финалини ўтказиб юбориши мумкин

Эслатиб ўтамиз, Испания терма жамоаси Евро-2024 ярим финалида Францияни мағлуб этди (2:1) ва одатдагидек ўз мухлислари олдида байрам қилиш учун майдонда қолди. Ўшанда Туркия терма жамоаси либосини кийган мухлис майсага тушиб келишга муваффақ бўлди ва улар билан суратга тушиш учун испаниялик футболчилар томон югурди. Стюардлар қоидабузарни тўхтатишга ҳаракат қилишди, бироқ бу жараёнда хавфсизлик ходимларидан бири сирпаниб кетиб, Альваро Моратанинг оёғига йиқилди. Ҳужумчи йиқилмади, бироқ оғриқ туфайли тиззасини ушлаб қолди, шундан сўнг у оқсоқланган ҳолда кийим алмаштириш хонасига йўл олди.

Шифокорлар ҳозирча аниқ маълумот бера олишмаяпти, бироқ Мората жиддий жароҳат олган бўлиши ва бир неча ҳафтага ўйиндан ташқари ҳолатда қолиш эҳтимоли бор. Батафсил ташхис бугун футболчи маҳаллий клиникада тўлиқ текширувдан ўтказилганидан сўнг қўйилади.