- Ўйин ҳақида фикрингиз?
- Қизиқарли ўйин гувоҳи бўлдик. Натижа қониқарсиз, лекин ўйинимиз ёмон эмас. Яна эски касалимиз қўзғади: гол ура олмадик. Баҳс бошида осон голни ўтказиб юбордик. Шундан кейин куч топиб олдинга бордик. Гол уришга муваффақ бўлдик, лекин қайси сабабга кўра офсайдни аниқлашди, тушунмадим. Биринчи марта ВАР орқадан чизиқ чизишини кўришим, ҳайрон қолдим. Лекин на илож, кинода айтади-ку: қози почча, чиқарган қонунлариз ҳамма нарсага тўғри келаверади. Янги қоида чиқиб биз бехабар қолдикми, ёки маълумотлардан орқадамизми - билмадим. Жуда уятли кўринди, шахсан мен тушунмадим. "Пахтакор"ни ғалаба билан табриклайман. Гол урмасанг вазият учун очко бермайди. Йигитларимизнинг кайфияти тушиб кетди. Энди кейинги ўйинга ҳозирлик кўрамиз.
- Иккинчи бўлимда етарлича вазиятлар яратилди. Жамоангиз нечанчи ўйиндирки 0:2 ҳисобида ортда бориб ҳам кўп вазиятларга эга бўляпти. Аммо ҳисоб тенглашиш ўрнига рақиб учинчи голни урди. Буни қандай изоҳлайсиз?
- Айтдим-у бир вазиятда голимизни ҳисобга олишмади. Янги қонун чиққан бўлса керак. Бунинг устига футболчимиз уч метрдан тўп кирита олмади. Танаффусга 2:1 ҳисобида чиқиб кетганимизда иккинчи бўлим бошқача кечиши мумкин эди. Машғулотларда йигитлар билан гаплашяпмиз. Хатоларни тушунтирамиз. Ҳисоб 3:0 бўлганида ҳам ўйин темпи тушиб кетмади. Охиригача кураш кечди.
- Мураббий сифатида жамоангиз кўрсатаётган футболдан қониқяпсизми?
- Қўл остимдаги футболчилардан миннатдорман. Натижага келсак, янада юқорида бўлишни мақсад қилгандик. Бунга ўзимиз айбдормиз. Август ойида ҳаммаси "Насаф" билан ўйиндан бошланди. "Насаф"га ютқазмаслигимиз керак эди. "Сурхон" билан "Динамо"ни ютишимиз, Бухорода ютқазмаслигимиз керак эди. Ҳамма ўйинларда вазият бўляпти. Барибир менда бугунги ўйин бўйича савол қоляпти: урган голимизда офсайд бормиди-йўқмиди. Балки камерани кўпайтириш керак. Чизиқни сал ҳақиқатга яқинроқ чизиш керак. Чунки бу ҳам мухлислар кайфиятига таъсир қилади. Жамоа билан ишлаш ўзи эмас. Футбол бу коптокни бер - ўйнайверади дегани эмас. Бу билан баҳона қилмаяпман, бор гапни айтяпман. Биз кўп очко йўқотдик, лекин мақсадимиз совриндорлар қаторига кириш. Бунинг учун охиригача курашамиз.
- ОКМК ўртамиёна жамоа бўлиб қолмай совриндорлар қаторида юриши учун нима қилиш керак деб ҳисоблайсиз?
- Қисқа айтганда яратилган вазиятлардан фойдаланиб гол уриш керак. Шунда ғалаба қозонасиз ва тепада юрасиз.
- 2024 йил ОКМК чемпионатда иккинчи ўринни олганди. Натижалар пасайиб қолса, одамлар Миржалол Қосимов ўсишдан тўхтаб қолди, ўн йил олдинги Қосимов эмас, жамоага янги қон керак деяпти.
- Энди ҳамманинг ўз шахсий фикри бор. Тилнинг суяги йўқ. Ҳозир ҳамма мутахассис. Лекин бу ерга келиб ишлаб кўришса билади. Нолийдиган жойим йўқ, биз мухлисларга ёқадиган футбол намойиш этяпмиз. Ҳар доим юқори натижа кўрсатишга ҳаракат қилганман. Мен бировнинг фикрига қараб яшамайман.
