Италия клуби бугун бош мураббий Аллегри, спорт директори Игли Таре, бош ижрочи директор Джорджио Фурлани ва техник директор Жеффри Монкаданинг истеъфосини эълон қилган эди. "La Gazzetta dello Sport" нашри ишдан бўшатилган ходимларга тўланадиган компенсация миқдорини ошкор қилди.
Хабарга кўра, Фурлани 2028 йилгача мўлжалланган шартномасига асосан бонуслар билан бирга тахминан 10 миллион евро ишлаб топиши керак эди (солиқлар чегирилгунга қадар). Аллегрининг шартномаси 2027 йилгача амал қилишини инобатга олсак, у 9 миллион евро "кул ранг" маош олиши мумкин эди, Игли Таренинг улуши эса тахминан 3 миллион еврони ташкил этади.
Жеффри Монкаданинг шартномаси эса жорий мавсум якунида тугаётган эди. Шу сабабли "Милан" унга фақатгина июнь ойи учун тегишли бўлган маошини тўлаб беради.
Таъкидланишича, бу рақамлар ҳали якуний эмас: клуб ишдан бўшатилган мутахассислар билан музокаралар олиб бориб, компенсация миқдорини камайтиришга эришиши мумкин. Мисол учун, Аллегри компенсациянинг бир қисмидан воз кечиши эвазига унга 2026/27 йилги мавсумда бошқа клубда ишлаш учун рухсат берилиши мумкин.
