Март ойи бошида "Навбаҳор" клуби президенти этиб тайинланган Расул Низамбаев ўз лавозимини тарк этди

"Навбаҳор" клуби раҳбариятида бир неча ўзгаришлар бўлди. Бу ҳақда клуб матбуот хизмати расман маълум қилди.

"Бугун "Навбаҳор" уй учрашувларини ўтказадиган "Марказий" стадионида йиғилиш ўтказилди. Уни Наманган шаҳар, Давлатобод тумани ҳокими Анваржон Тожимирзаев олиб борди. 

Йиғилишда ташкилий масала кўрилди. "Навбаҳор" ПФК президенти Расул Низамбаев соғлигидаги муаммолар сабабли, ўз аризасига биноан истеъфога чиққани маълум қилинди.  

Шунингдек, Бахтиёр Нурматов яна "Навбаҳор" клуби бош директори лавозимига қайтди. 

Бунгача ушбу лавозимда фаолият юритган Акмал Сохибов эса директор ўринбосари вазифасини бажарувчи лавозимида ишлайдиган бўлди", -дейилади "Навбаҳор" клуби расмий баёнотида.

Маълумот учун, "Навбаҳор" ПФК президенти Расул Низамбаев 2024 йилнинг бешинчи март куни ушбу лавозимга тайинланганди.