Учрашувнинг 72-дақиқасида бош ҳакам Жоау Педру Пиньейру VAR ёрдамида вазиятни кўриб чиқиб, швейцариялик ҳужумчи Брил Эмболога симуляция учун иккинчи сариқ карточка кўрсатди ва уни майдондан четлатди.
"Ўйин тугагач, энг аввало жамоамиз билан фахрландим. Аргентина очиқ ўйинда деярли хавфли вазият ярата олмади. Афсуски, Хулиан Альвареснинг голи баҳс тақдирини ҳал қилди.
Мен одатда ҳакамлар ҳақида гапиришни ёқтирмайман, аммо бугун барча қарорлар уларнинг фойдасига чиқди. Фаолиятим давомида бунчалик бир томонлама ҳакамликни кўрмаганман.
Аргентина футболчиларининг бирорта симуляцияси ҳам жазоланмади. Улар асосий вақт давомида ҳатто битта ҳам сариқ карточка олишмади. Аммо Брил билан бўлган эпизодда дарҳол карточка кўрсатилди.
Шунга қарамай, биз ўн киши бўлиб ҳам қўлимиздан келган барча ишни қилдик. Албатта, Брил жамоамиз учун жуда муҳим футболчи ва биз уни қўллаб-қувватлаймиз", - деди Аканжи.
Эслатиб ўтамиз, Швейцария учрашувнинг катта қисмини бир киши кам бўлиб ўтказганига қарамай, Аргентинага муносиб қаршилик кўрсатди. Бироқ қўшимча бўлимларда аргентиналиклар ғалабани таъминлаб, ЖЧ–2026 ярим финалига йўл олди.
